Ish-deputeti i Partisë Demokratike, Ervin Salianji ka bërë rekurs në Gjykatën e Lartë, ku kundërshton vendimet e gjykatave për burgosjen e tij.
Në shkresën e rekursit të bërë nga avokatët e tij, Salianji thotë se kundërshton vendimin e datës 18 dhjetor 2019 të Gjykatës Penale që vendosi për ish deputetin 1 vit burgim, por edhe vendimin e datës 26 shtator të Apelit të të Përgjithshëm, e cila la në fuqi vendimin e Shkallës së Parë.
Kjo vonesë për rekursin në Gjykatën e Lartë vjen për shkak të vonesës së Gjykatës së Apelit për zbardhjen e vendimit me 20 ditë jashtë afatit, apo 50 ditë pas dhënies së vendimit.
Kujtojmë që më 15 tetor, Gjykata e Lartë refuzoi një kërkesë të ish-deputetit demokrat Ervin Salianji, për pezullimin e dënimit me 1 vit burgim
Gjykata e Apelit e dënoi më 26 shtator me 1 vit burgim Ervin Salianjin për shkak se i prishi imazhin Qeverisë duke denoncuar Geron Xhafajn, vëllain trafikant droge të ish-ministrit Fatmir Xhafaj. Prej 27 shtatorit ai ndodhet në burgun e Fierit.
Vetë Ervin Salianji, por dhe Partia Demokratike e kanë konsideruar këtë vendim si një hakmarrje politike të Edi Ramës dhe Fatmir Xhafajt dhe të pambështetur në prova dhe në ligj.
