Kreu i grupit parlamentar të PD-së, Gazment Bardhi ka reaguar pas vendimit të GJKKO-së për të liruar nga izolimi liderin demokrat Sali Berisha, duke i revokuar masën e sigurisë “Arrest në shtëpi”.
Në një postim në rrjetet sociale, Bardhi shkruan se kjo është një fitore politike e vetë Berishës, i cili sipas tij, luftoi dhe në fund fitoi. Ai shton më tej se çdo ditë vonesë do të ishte një sulm politik i drejtësisë ndaj kundërshtarëve të regjimit të Edi Ramës, me qëllim pengimin e aktivitetit politik të tyre në funksionalitet të plotë të betejës së opozitës.
Bardhi deklaron se rreth 1 vit pengesë antikushtetuese e aktivitetit politik të liderit të opozitës është mjaftueshëm e rëndë për të toleruar të bëheshin më shumë
Postimi i plotë:
Revokimi nga GJKKO i masave kufizuese joproporcionale ndaj Sali Berishës është vendimi i duhur ligjor dhe nën frymën, standardin dhe logjikën e vendimit të disa ditëve më parë të Gjykatës Kushtetuese. Çdo ditë vonesë do të ishte një sulm politik i drejtësisë ndaj kundërshtarëve të regjimit të Edi Ramës, me qëllim pengimin e aktivitetit politik të tyre në funksionalitet të plotë të betejës së opozitës.
Afërsisht 1 vit pengesë antikushtetuese e aktivitetit politik të liderit të opozitës është mjaftueshëm e rëndë për të toleruar të bëheshin më shumë! Kjo është një fitore politike e Sali Berishës, që luftoi, luftoi, luftoi dhe e fitoi!
