Janë publikuar pamjet e atentatit të regjistruar mbrëmjen e 13 Nëntorit në Tiranë ndaj biznesmenit 52-vjeçar Eduart Reçi, për të cilën u arrestuan si autor të ngjarjes dy vëllezërit Shkëlqim dhe Flrojan Dukaj, respektivisht 48 vjeç dhe 45 vjeç.
Siç shihet në videon e mëposhtme të fiksuar nga kamerat e sigurisë në zonë dhe të siguruar nga Top Channel, Reçi shfaqet në sheshpushimin e pallatit të tij, duke përdorur telefonin.
Teksa ka qenë duke dërguar mesazh me telefon, ai është qëlluar me plumb në kokë dhe rrëzohet menjeherë në tokë. Ngjarja është regjistruar rreth orës 22:39 të mbrëmjes, në rrugën “Faik Konica” pranë Fakultetit të Historisë dhe Filologjisë.
Në rolin e qitësit ka qenë Shkëlqim Dukaj, i cili është edhe efektiv i OPGJ-së në komisariatin numër 2 në Tiranë, ndërsa vëllai i tij Florjan Duka hidhte fishekzjarre dhe shashka për të kamufluar ngjarjen.
Polici Shkëlqim Dukaj ka qenë i pozicionuar në disa shkallë metalike në katin e dytë të një hoteli pranë vendit të krimit, në momentin kur ka qëlluar drejt biznesmenit.
I filmuar nga kamerat e sigurisë, Shkëlqim Dukaj shkonte për disa ditë rresht në atë vend prej orës 19:00 deri në orën 23:00, ku ruante viktiminën Eduart Reçi. Dyshohet se ai e ka provuar ta kryente atentatin dhe 3 ditë para krimit, por nuk ka arritur dot që ta kapë shënjestrën.
Uniformat blu kanë ushtruar kontroll në lokalin e dy vëllezërve, ku në magazinën e lokalit janë gjetur një armë zjarri pjesërisht e dëmtuar, 6 objekte cilindrike te ngjashme me silenciatorë me përmasa të ndryshme, pjesë dhe mekanizma të ndryshëm që përdoren për silenciatorët, dy jelekë antiplumb dhe pajisje të ndryshme elektronike.
Të gjitha armët dhe pajisjet janë sekuestruar në cilësinë e provës materiale, dhe sipas autoriteteve ato dokumentojnë veprimtarinë dhe dinamikën e autorëve të dyshuar të kësaj ngjarje.
Arma e krimit ende nuk është gjetur, por janë administruar disa pajisje kompjuterike dhe ndër to është parë se dy vëllezërit kishin porositur online blerjen e një pushke.
Shkëlqim Duka rezulton se ka kryer studimet në Akademinë e Policisë në Turqi, ndërsa njihej nga grupi i oficereve për dëshirën për qitje me armë zjarri, e sidomos atyre me snajper.
Sipas hetimeve, Eduart Reçi është vrarë për motive pronësie, për shkak të një pallati që kishte planifikuar të ndërtonte në një tokë publike ku pretendonte se ishte pronari, por ndërkohë ndërtimi i pallatit prishte dhe një pjesë të lokalit në pronësi të dy vëllezërve Dukaj.
*Momentin e atentatit mund ta shikoni nga minuta 2:18
