Pavarësia e Shqipërisë e cila përkujtohet më 28 Nëntor ka bërë bashkë pas më shumë se dhjetë vitesh konflikti edhe tifozët shqiptar të Shkëndijës dhe Shkupit, në Maqedoninë e Veriut.
Të mërkurën në Tetovë dy skuadrat do përballen për raundin e 16-të të kampionatit, teksa është konfirmuar se prezent do jenë edhe “Shvercerat”, tifo-grupi që mbështet skuadrën shqiptare nga Shkupi.
Veç saj, klubi i Shkëndijës i ka quajtur vëllezër duke dashur të ulë tonet mes tifozëve.
Historiku
“Ballistët” e Shkëndijës dhe “Shvercerat” e Shkupit kanë pasur marrëdhënie të shkëlqyera deri para dhjetë vitesh, kur nisën edhe përplasjet mes tyre, çka solli që edhe Federata e Futbollit në vendin fqinj mos lejonte tifozë miq në ndeshjet mes tyre, nga frika e përplasjeve.
Prej disa muajsh gjërat janë sheshuar dhe shqiptarët janë bërë bashkë, duke mos pasur më mosmarrëveshje. Veç saj, pas një kohe të gjatë “Shvercerat” do jenë të organizuar në stadiumin e Tetovës.
Duket se 28 nëntori 1912, dita e Pavarësisë i ka ende “flakët e zjarrta” dhe bën bashkë shqiptarët, me stadiumin që pritet të jetë kuqezi në Tetovë.
