Është shtyrë sërish seanca në Gjykatën e Posaçme për kreun e Partisë Demokratike, Sali Berisha, teksa seanca e radhës është caktuar që të mbahet më 16 Dhjetor në orën 11:00.
Shkaku për shtyrjen e gjyqit ka qenë i njëjti me atë të seancës së kaluar, ku avokatët kanë kërrkuar më shumë kohë për t’u njohur me aktet e dosjes së privatizimit të ish-kompleksit sportiv “Partizani”.
Për këtë dosje është përzgjedhur me short gjyqtarja Flojera Davidhi, e cila do të marrë vendimin nëse çështja do të dërgohet ose jo për gjykim. Ajo mund të dërgojë për gjykim dosjen, mund ta kthejë pas për plotësim hetimesh ose e pushon çështjen. Davidhi brenda 10 ditësh cakton datën e seancës paraprake.
Kujtojmë se Berisha është marrë i pandehur për akuzën e veprës penale “Korrupsion pasiv i funksionarëve të lartë shtetërore ose të zgjedhurve vendorë”, kryer në bashkëpunim.
Po ashtu, i pandehur për të njëjtën çështje është marrë edhe dhëndri i tij, Jamarbër Malltezi për akuzën e veprës penale “Korrupsion pasiv i funksionarëve të lartë shtetërore ose të zgjedhurve vendorë”, kryer në bashkëpunim, si dhe për “Pastrim të produkteve të veprës penale ose veprimtarisë kriminale”. Të pandehur të tjerë janë marrë dhe Fatmir Bektashi, Xhimi Begeja dhe Andia Pustina.
Sipas SPAK-ut, Berisha në kohën kur ka qenë kryeministër ka vendosur në funksion të interesave të dhëndrit të tij bazën ligjore, si edhe ka ushtruar presion mbi vartësit për të nxitur plotësimin sa më të shpejtë të procedurave të kthimit të pronës dhe privatizimit të godinave të degraduara të ish-klubit sportiv “Partizani”.
Ndërkohë, avokati i Berishës, Genc Gjokutaj është pronocuar për mediat pas shtyrjes se seancës, ku tha se Gjykata e Strasburgut e ka konsideruar si prioritare çështjen e ish-kryeministrit dhe i është drejtuar me pyetje shtetit shqiptar.
Gjokutaj: Seanca është shtyrë për në datën 16 dhjetor. Doja të bëja me dije se jemi njoftua se Gjykata e Strasburgut pa shteruar ende gjykimin në Gjykatë Kushtetuese ka kaluar në fazën e debatit çështjen e zotit Berisha. E ka konsideruar çështje prioritare dhe i ka drejtuar pyetje shtetit shqiptar për procesin e parregullt ligjor. Janë të gjitha ankimet për detyrimin paraqitje, arrestin shtëpi, anti kushtetueshmërinë dhe pasojat që rrjedhim, ndërprerjen e aktivitetit si lider opozite dhe deputet.Të gjitha problematikat që i kemi paraqitur Strasburgu ka ecur në një shpejtësi pa precedent. Ne do presim shkresa ka ardhur drejtuar shtetit shqiptar, do plotësohen pyetje dhe do merret vendim.’
