Komisioni i Apelit në FSHF ka vendosur të pezullojë vendimin që i mbyllte dyert tifozëve të Tiranës për pjesën e mbetur të sezonit pas ngjarjes të ndodhur me ndeshjen kundër Vllaznisë ku 3 futbollistë shkodran u dëmtuan si pasojë e një kapsolli të hedhur në fushë nga dy tifozë.
Përveç gjobës që ka mbetur e pandryshuar, Apeli ka vendosur të konvertojë dënimin në 8 ndeshje pa tifozë, por ndërkohë e ka pezulluar atë pas 3 ndeshjeve me kushtin që nëse përsëritet do rikthehet masa drastike.
Kjo do të thotë se derbi i fundjavës në “Air Albania” mes Tiranës dhe Partizanit do të luhet me tifozë. Padiskutim një vendim që kënaq më shumë tifozët e Tiranës, të cilët disa herë kishin protestuar dhe e kishin cilësuar si një vendim komunist që të dënoheshin të gjithë tifozët për dy individë.
Njoftimi:
Komisioni i Apelit të Disiplinës dhe Etikës pasi u njoh me relacionin e Sekretariatit Teknik, dogjoi përfaqësuesit e Klubit të Futbollit Tirana, shqyrtoi dokumentacionin e paraqitur dhe diskutoi çështjen në tërësi si dhe duke u bazuar në nenet 65 e vijues të Kodit të Disiplinës dhe Etikës,
VENDOSI:
Lënien në fuqi të masës së dënimit me gjobë në masën 300.000 (treqind mijë) lekë.
Ndryshimin e pjesës tjetër të vendimit duke vendosur:
Dënimin e Klubit të Futbollit Tirana për zhvillimin e të 8 (tetë) ndeshjeve pa spektatorë.
Pezullimin e pjesës së mbetur të dënimit prej 5 (pesë) ndeshjesh.
Pezullimi i dënimit revokohet nëse gjatë periudhës së provës KF Tirana kryen një shkelje tjetër të natyrës dhe rëndësisë së ngjashme.
Periudha e provës do të jetë deri në përfundim të sezonit futbollistik 2024-2025.
Kundër këtij vendimi lejohet ankim në Gjykatën e Arbitrazhit Sportiv (CAS/TAS) Lozanë Zvicër.
