Për shkak të kërkesës së ulët të tregut të punës dhe numrit të paktë të studentëve, këtë vit në Shqipëri nuk u hapën 10 programe studimi, kryesisht në universitetet jashtë Tiranës.
Arjan Xhelaj, kreu i Rrjetit Akademik Shqiptar, thotë se programet të cilat u mbyllën këtë akademik janë kryesisht gjuhë të huaja.
“Janë prekur shumë programe nga shkencat sociale, edhe programe dy vjeçare me pak regjistrime. Por këto kanë qenë kryesisht në aktorët jo publikë. Nga aktorët publikë ne kemi 3 kërkesa në tre universiteteve rajonale, për mos hapjen e disa programeve, por jo mbylljen totale të tyre. Një pjesë e tyre ishte në universitetin e Durrësit, që ishin kryesisht në gjuhën angleze, Korça dhe Gjirokastra”.
Xhelaj thotë se një nga faktorët që po ndikon në uljen e numrit të studentëve është se është rritur numri i maturantëve me mesatare nën 6.5, shumica e të cilëve nuk preferojnë të ndjekin studimet e larta.
Inxhinieria, teknologjia, mjekësia dhe infermieria mbeten degët më të preferuara të studentëve shqiptarë, të cilat kërkohen dhe paguhen më shumë në tregun shqiptar./Tv Klan
