UEFA ka marrë vendim për ndeshjen mes Kombëtares së Kosovës dhe asaj të Rumanisë të zhvilluar në Bukuresht, në kuadër të Ligës së Kombeve.
Kosova ka humbur me rezultat zyrtar 3-0 ndeshjen e braktisur ndaj Rumanisë të premten e kaluar, kur ndeshja ishte barazim 0-0 deri në minutat shtesë.
Është UEFA e cila ka njoftuar me vendimin e saj gjatë ditës së sotme (e mërkurë), ku përveç humbjes me rezultat zyrtar, Kosova është gjobitur edhe me të holla.
Vendimi ka qenë i çuditshëm pasi nga një anë Rumania është ndëshkuar me supergjoba mbi 100 mijë euro në total për sjelljen e tifozëve dhe mesazhet e tyre raciste, por nga ana tjetër, është vendosur që Kosova të humbë ndeshjen në tavolinë.
Me këtë vendim, Rumania mbetet e para në grup me 18 pikë, ndërsa Kosova e dyta në grup (12 pikë) do ta kërkojë kalimin në Ligën B përmes Play off.
Vendimi i plotë i UEFA-s:
Të gjobisë Federatën Rumune të Futbollit me 50,000 euro dhe të urdhërojë mbylljen e stadiumit të Federatës Rumune të Futbollit gjatë (1) ndeshjes së ardhshme në të cilën Federata Rumune e Futbollit do të luajë si shoqatë mikpritëse, për sjelljen raciste dhe/ose diskriminuese të mbështetësve të saj ( në lidhje me thirrjet ksenofobike antihungareze).
Të gjobisë Federatën Rumune të Futbollit me 9000 euro për hedhjen e sendeve .
Të gjobisë Federatën Rumune të Futbollit me 4500 euro për ndezjen e fishekzjarreve .
Të gjobisë Federatën Rumune të Futbollit me 8000 euro për përdorimin e treguesit lazer .
Të gjobisë Federatën Rumune të Futbollit me 12,500 euro për shkak të shqetësimit gjatë himnit kombëtar .
Të gjobisë Federatën Rumune të Futbollit me 14,000 euro për bllokimin e rrugëve publike .
Të paralajmërojë Federatën Rumune të Futbollit për sjelljen e pahijshme të ekipit të saj.
Akuzat ndaj Federatës së Futbollit të Kosovës :
Refuzimi për të luajtur (Forfeit), Art. 27(1) DR dhe Art. 27(4)(a) DR në lidhje me Art. 25.01 Rregulloret e UEFA Nations League
Sjellja e pahijshme e ekipit (kartonë të verdhë 5 lojtarë ose më shumë), Art. 15(4) DR
Vendimi :
AB ka vendosur:
Të shpallë ndeshjen e UEFA Nations League 2025 ndërmjet ekipeve përfaqësuese të Federatës Rumune të Futbollit dhe Federatës së Futbollit të Kosovës , e cila u luajt më 15 nëntor 2024, një ndeshje e konfiskuar nga Federata e Futbollit të Kosovës (e cila për këtë arsye konsiderohet se ka humbur ndeshja 3-0 ) për përgjegjësinë që ndeshja nuk luhet plotësisht (siç parashikohet në Nenin 25.01 Rregulloret e Kombeve të UEFA-s Liga).
Të gjobisë Federatën e Futbollit të Kosovës me 6000 euro për sjellje të pahijshme të skuadrës së saj.
Ndeshja e Ligës së Kombeve
Në datën 15 nëntor Rumania dhe Kosova u përballën në Bukuresht për Ligën e Kombeve. Sfida u ndërpre në minutën 90+3, kur kapiteni i dardanëve, Amir Rrahmani tërhoqi ekipin e tij nga fusha pas thirrjeve të tifozëve vendas kundër shqiptarëve.
“Serbia, Serbia” dhe “Kosova është Serbi” ushtonin në arenën e Bukureshtit, me Rrahmanin që para vendimit kishte njoftuar tre herë më parë arbitrin, por pa marrë një përgjigje.
Pas më shumë se një ore në dhomat e zhveshjes, shumë bisedave, tensionit mes palëve dhe komunikimit mes zyrtarëve, Kosova nuk u kthye në fushë duke ndjerë një racizëm të përsëritur në Bukuresht, njëjtë si një vit më parë.
Me sfidën që ishte 0-0 dhe donte vetëm dy minuta të përfundonte, Kosova nuk u kthye në fushë dhe ndeshja u mbyll.
