Republika Çeke në alarm mungesash përpara ndeshjes me Shqipërinë në Ligën e Kombeve. Rivalët e Kombëtares do të paraqiten në Tiranë pa lojtarët titullarë në mbrojtje.
Kjo për shkak se Ladislav Krejčí i Girona-s, Martin Vitík i Spartës dhe David Zima i Slavia-s nuk janë grumbulluar për arsye shëndetësore.
Të tre këta janë lojtarët që janë aktivizuar më së shumti në repartin difensiv gjatë muajve të fundit, madje dy të parët kanë qenë titullarë të padiskutueshëm.
Trajneri Ivan Hašek nuk do të ketë në dispozicion as Lukáš Kalvach, mesfushorin e Viktoria Plzen, që është një prej alternativave në stolin e rezervave.
Një mungesë e madhe është edhe ajo e sulmuesit Patrik Schick. Edhe pse gjatë fundjavës që kaloi ai shënoi me ekipin e Bayer Leverkusen, 28-vjeçari nuk është në dispozicion të përfaqësueses.
Të premten Çekia do të zbarkojë në Tiranë për stërvitjen zyrtare dhe konferencën për shtyp përpara duelit të së shtunës, më 16 nëntor, në Arenën Kombëtare.
