Grupi parlamentar i Partisë Socialiste është mbledhur këtë të hënë në Kryesinë e Kuvendit, ku mësohet se në diskutime mes ligjvënësve socialistë ka qenë angazhimi i tyre në komisionet parlamentare dhe në seancat e ardhshme në Kuvend.
Burime për mediat bëjnë me dije se në fokusin kryesor të diskutimeve ka qenë miratimi i Buxhetit të Shtetit për vitin 2025, me qëllim që të miratohet në kohë.
Drejtuesit e grupit parlamentar theksuan rëndësinë e përfshirjes së çdo deputeti në këtë proces, duke e konsideruar buxhetin një çështje prioritare që kërkon angazhim të plotë nga ana e tyre. Buxheti i Shtetit për vitin 2025 pritet të miratohet në një seancë maratonë të hënën dhe të martën e ardhshme në Kuvend.
Gjithashtu, burime për mediat bëjnë me dije se është diskutuar dhe për të maksimizuar votën e diasporës, ku emigrantët do të votojnë për herë të parë në zgjedhjet parlamentare të vitit 2025.
Kryeministri Edi Rama pretendon se puna nuk po ecën me ritmet e pritura prej tij, pasi kërkon që të ndërtojnë një sistem patronazhim, siç ka bërë vitet e fundit edhe me shqiptarët brenda vendit.
Burimet për mediat bëjnë me dije se “grupi i diasporës” ka arritur të sigurojë kontakte me afro 50 mijë shtetas shqiptarë që jetojnë jashtë Shqipërisë, nga afro 1.6 milion emigrantë që rezultojnë me të drejtë vote.
Këto shifra kanë ngritur shqetësim në mbledhjen e grupit të PS dhe është kërkuar angazhimi i të gjithë deputetëve që të vendosin në funksion të “votës së diasporës” të gjitha kontaktet e tyre.
