Këshilli i Ministrave ka miratuar në mbledhjen e kësaj të mërkure vendimin për të akorduar një fond shtesë në buxhetin e vitit 2024 për Komisionin Qëndror të Zgjedhjeve.
Sipas këtij vendimi, KQZ do të marrë një fond shtesë prej 20.9 milionë lekësh (209 milion lekë të vjetra), të cilat do të përdoren për mbulimin e shpenzimeve përgatitore që i paraprijnë zgjedhjeve të vitit të ardhshëm.
Shtesa e fondit do të kontribuojë në përgatitjen e KQZ për zhvillimin e zgjedhjeve të ardhshme, shkruan A2.
Në vendimin e firmosur nga kryeministri Edi Rama theksohet se ky fond shtesë do të financohet nga fondi rezervë i buxhetit të shtetit për vitin 2024.
Ministria e Financave dhe Komisioni Qendror i Zgjedhjeve janë ngarkuar me zbatimin e këtij vendimi, i cili hyn në fuqi menjëherë dhe do të publikohet në “Fletoren Zyrtare”.
