Deputetja e Partisë së Lirisë, Monika Kryemadhi wshtw paraqitur këtë të hënë në SPAK, në zbatim të masës së sigurisë “detyrim paraqitje”.
Pas daljes nga SPAK, Kryemadhi në një deklaratë për mediat tha se ka zgjedhur të përballet me drejtësië për të provuar me prova dhe fakte të kundërtën e asaj që thuhet për të.
“Unë jam një individ dhe politikane që vendos të përballem madhe me padrejtësitë që bëhen. Po bëj mbrojtjen time ligjore, kam konstatuar një sërë shkeljesh ligjore të akuzës. Këto do të kundërshtohen me fakte që do të vërtetojë të kundërtën e asaj që shkruhet. Do të njiheni me të vërtetat e Monika këmbësores dhe satelitëve të gjithësisë”, tha ajo.
E pyetur nëse është takuar në burg me ish-bashkëshortin e saj Ilir Meta, Krymadhi u përgjigje se nuk ka asnjë komunikim me të.
Monika Kryemadhi është nën hetim për dosjen “Meta”, e cila ka çuar pas hekurave ish-bashkëshortin e saj, njëherësh President i PL, Ilir Meta, i cili u arrestua me urdhër të SPAK dhe akuzohet për veprat penale të korrupsionit, pastrimit të parave dhe mosdeklarimit të pasurisë.
Sipas vendimit të GJKKO, Kryemadhi duhet të paraqitet në Prokurorinë e Posaçme, çdo të hënë të parë të muajit, në orën 12:00.
Ndërkohë, për të njëjtën çështje është vendosur masa e sigurisë “arrest shtëpie” për ish-zyrtarin Pirro Xhixho, i akuzuar gjithashtu për korrupsion pasiv si dhe masa e “detyrimit për paraqitje” për Ema Çokun, e akuzuar për pastrim të produkteve të veprës penale.
Sakaq, kujtojmë se këtë të hënë Kryemadhi ka ankimuar vendimin e masës “detyrim për paraqitje”, duke dërguar ankimimin e saj përmes postës ditën e shtunën.
