Kryetari i Bashkisë së Shkodrës, Benet Beci u thirr paraditen e të premtes (1 Nëntor) në Prokurorin e Posaçme (SPAK).
Pas daljes nga SPAK, Beci u pyet nga gazetarët nëse a kishte dhënë dorëheqjen e parevokueshme te kryeministri Edi Rama, por përgjigjia e tij nuk ishte konkrete, duke u përgjigjur shkurtimisht se: “do të flas në momentin e duhur”
Kjo përgjigje e “çuditshme” duke mos mohuar dorëheqjen kur vetëm një vit e gjysmë më parë fitoi për herë të parë pas 34 viteve nën siglën e PS, bastionin e demokratëve bashkinë e Shkodrës, la hije dyshime se “aseti” i ri i Ramës të cilin në Asamblenë e fundit e katapultoi edhe anëtar të kryesisë së PS, ka rënë keq në rrjetën e SPAK.
Gjithçka duket se ka të bëjë me një hetim gati sekret për mediet nga SPAK ndaj tij.
“Alfapress” ka mësuar se Becit ditën e premte në Prokurorinë e Posaçme i është komunikuar procedimi penal për veprën e korrupsionit, gjatë kohës që ka qenë në krye të Fondit Shqiptar të Zhvillimit, të cilin e ka drejtuar që në kohën e qeverisë Berisha dhe në vazhdim në qeveritë Rama. Më pas ai drejtoi Korporatën Elektroenergjitike Shqiptare. (KESH), deri sa u përfshi në politikë duke kandiduar dhe zgjedhur si kryebashkiak i socialistëve në qytetin e Shkodrës.
Gjithashtu, raportohet se “momenti i duhur” për Benet Becin është dita e nesërm, kur dhe kryebashkiaku i Shkodrës do të njoftojë zyrtarisht dorëheqjen e parevokushme. Po brenda këtyre ditëve pritet edhe masa e SPAK ndaj Becit, e cila rrezikon deri në arrestim.
Por, ndërkohë, Benet Beci ka reaguar në rrjetet sociale, pas lajmeve të dorëheqjes së tij, ku e mohon indirekt nëpërmjet ironisë së tij.
“Nuk e di ku dreqin e kane marre vesh disa portale qe kam dhene doreheqjen se ishte sekret deri neser! Po tani qe doli po e them edhe arsyen: Neser zgjidhem une President i Amerikes me kerkese te dy kandidateve te tjere, meqe e tregova ne Shkoder se jam i pelqyeshem per te dy palet” – shkruan Benet Beci.
Kujtojmë se Benet Beci është i shumë akuzuar nga opozita, e cila pretendon se ai e fitoi Bashkinë e Shkodrës në bashkëpunim me krimin e organizuar.
