Drejtuesi politik i qarkut të PD-së në Shkodër, Luçiano Boçi ka deklaruar për mediat nga protesta në qytetin verior se sot në vend po sundon krim-politika, duke theksuar se ka mbështetjen e policisë.
Ai u shpreh se marshimi nuk bëhet vetëm për Shkodrën, ku ndodhi masakra me 3 viktima, por për të gjithë vendin.
“Sot sundon krim-politika, ka bekimin e Ramës, mbështetjen e policisë së shtetit. Krimi mbron interesat e veta financiare bashkë me politikën, korr votat dhe kur i prishin interesat bën edhe shumë vrasje. E shoh si vënie fuqi për të mposhtur Shkodrën.
Ky marshim nuk organizohet vetëm për Shkodrën por për të gjithë Shqipërinë, Nuk ka kohë më për të heshtur, por për mosbindje. Do e vazhdojmë aksionin tonë në mënyra e forma të ndryshme.
Është realitet që duhet ndryshuar, e ndryshon politika e opozita, që duhet të përcjellë shpresë.
Ngjarja nuk erdhi si rrufe në qiell të hapur, ka vite që investohet”, tha Boçi.
