Janë zbardhur detaje të reja nga masakra që u regjistrua pasditen e djeshme në Dobraç të Shkodrës, ku u ekzekutuan në një atentat mafioz Hamza `Lici, (vëllai i Ibrahim Licit) dhe Arlind Bushati (djali i Xhaml Bushatit, ish-kryetar i Këshillit Bashkiak në Shkodër dhe kandidat për kryebashkiak).
Viktimë aksidentale mbeti edhe Flutura Basha, një person krejt i pafajshëm, e cila u ndodh në vendin dhe momentin e gabuar, teksa po udhëtonte me motor me bashkëshortin e saj, Bashkim Basha, ku ky i fundit mbeti i plagosur dhe ndodhet në gjendje të rëndë.
Burime për mediat pranë grupit hetimor bëjnë me dije se nga hetimet paraprake dyshohet se kanë marrë pjesë 4 persona në atentat. Më konkretisht në automjetin tip “Range Rover” kanë dy persona në rolin e vrasësve dhe një tjetër në rolin e shoferit. Më pas dyshohet se ka qenë dhe një person i katërt, i cili i ka larguar nga vendi i ngjarjes, pasi dogjën makinën tek zona e ish-repartit ushtarak në fshatin Golem të njësisë Rrethina.
Burime bëjnë me dije se autorët i kanë dalë paralel makinës ku po udhëtonte Hamza Lici dhe Arlind Bushati, duke i qëlluar me breshëri kallashnikovi për rreth 150 metra.
Dyshohet se e gjithë kjo skenë e krimit nga momenti i parë kur autorët kanë nisur të qëllojnë drejt shënjestrave deri te plumbat e fundit ka zgjatur për rreth 70 sekonda. Mësohet se dy personat që kanë qenë në rolin e qitësit kanë qenë të maskuar.
Pas breshërisë së plumbave, mjeti ku udhëtonin viktimat ka përplasur motorin ku ndodheshin çifti i bashkëshortëve, Flutura Basha, e cila vdiq në vendngjarje, dhe Bashkim Basha, që ndodhet në gjendje të rëndë në spital.
Policia ka sekuestruar kamerat e sigurisë që mund të kenë fiksuar të gjithë skenën e ngjarjes. Mbrëmjen e djeshme u shoqërun në komisariat për t’u marrë në pyetje rreth 10 persona, mes të cilëve dhe Safet Bajri, një ndër krerët e grupit kriminal Bajri, të cilët kanë përplasje me fisin Lici duke shkaktuar dhjetra viktima në vitet e fundit në Shkodër.
