Policia e Tiranë ka arrestuar dy vëllezër, të cilët ishin shpallur në kërkim ndërkombëtar nga autoritetet italiane, pasi akuzohen për grabitje me armë dhe rrëmbim të paligjshëm
Në kuadër të operacionit policor të koduar “Brothers” janë vënë në pranga shtetasit Bashkim Hoxha alias Kotherja, 35 vjeç dhe Oltion Hoxha, 32 vjeç, të dy banues në Tiranë. Njëri është kapur në zonën e Kisnostudios dhe tjetri në zonën e Freskut.
“Këta shtetas ishin shpallur në kërkim ndërkombëtar, pasi Gjykata e Savona, Itali, iu ka caktuar masën e sigurisë “Arrest në burg”, për veprat penale “Grabitja me armë” dhe “Rrëmbimi i paligjshëm” parashikuar nga Kodi Penal italian.” – thuhet në njoftimin e Policisë.
Blutë e kryeqytetit bëjnë me dije se po vijojnë procedurat për ekstradimin e dy vëllezërve në Itali.
