Një masakër e vërtetë ka ndodhur pasditen e sotme në aksin rrugor “Shkodër-Koplik”, në Dobraç, ku është qëlluar me armë zjarri në drejtim të një automjeti tip ‘Benz’.
Nga informacionet e para viktimë ka mbetur vëllai i Ibrahim Licit, dhe një grua kalimtare. Ndërsa janë plagosur rëndë Arlind Bushati, djali Xhemal Bushatit, ish-kandidati i PD për kryebashkiak dhe bashkëshorti i kalimtares që humbi jetën.
Ngjarja e rëndë ka ndodhur të ‘5 Heronjtë’ në zonën e Dobraçit.
Persona ende të panjohur kanë qëlluar me breshëri plumbash drejt një ‘Benzi’ në lëvizje me targa kroate ku po udhëtonin Arlind Bushati dhe Hazma Lici. Makina e tyre ka humbur kontrollin dhe janë përplasur me motorin me të cilin po udhëtonin çifti i bashkëshortëve dhe me murin rrethues të një banese.
- Pamje nga vendi i ngjarjes
- Identifikohet çifti i bashkëshortëve
Identifikohet çifti i bashkëshortëve që mbetën viktimë e atentatit të rëndë të ndodhur pasditen e sotme në Dobraç.
Mësohet se persona ende të paidentifikuar kanë qëlluar drejt makinës me targa kroate ku udhëtonin Arlind Bushati dhe Hamza Lici.
Pas të shtënave automjeti ku lëvizinin Lici e Bushati kanë humbur kontrollin duke përplasur çiftin e bashkëshortëve të cilët udhëtonin me motor dhe me një mur rrethues të një banese.
Gruaja, Flutura Basha ka ndërruar jetë në vendin e ngjarjes ndërsa është në gjëndje të rëndë për jetën në spitalin e Shkodrës bashkëshorti i saj Bashkim Basha.
- Kush është Arlind Bushati?
Arlind Bushati rreth dy javë më parë denoncoi në policinë e Shkodrës një kërcënim që i kishte ndodhur në pedonalen e qytetit. 32-vjeçari pretendoi se persona të paidentifikuar që qarkullonin me motor dyshohet se i kanë drejtuar armën pranë një lokali në pedonalen e Shkodrës, ku ka pasur edhe shumë qytetarë të tjerë në lokal.
Nuk sqarohet ende pozicionini Arind Bushatit në ngjarje, nëse ka qenë në makinë me Licin apo kalimtar.
Policia po mbledh prova, pasi ka dyshime për shkëmbim zjarri. Në vendgjarje grupi hetimor ka gjetur gëzhoja të modeleve të ndryshme.
Viktimat e atentatit në Shkodër:
Hamza Lici – Vëllai i Ibrahim Licit
Flutura Basha – kalimtare e rastit
Të plagosur rëndë:
Arlind Bushati – Djali i Xhemal Bushatit
Bashkim Basha – bashkëshorti i Fluturës
- Çfarë njoftoi policia e Shkodrës
“Rreth orës 15:50, në aksin rrugor “Shkodër-Koplik”, në Dobraç, është qëlluar me armë zjarri në drejtim të një automjeti tip Benz, në lëvizje, me të cilin qarkullonin shtetasit H. L. dhe A. B.
Si pasojë e të shtënave ka humbur jetën shtetasi H. L., dhe është plagosur rëndë shtetasi A. B.
Automjeti që udhëtonin shtetasit H.L dhe A.B, ka humbur kontrollin dhe për pasojë ka përplasur një motoçikletë që udhëtonte shtetasi B.B dhe bashkëshortja e tij shtetasja F.B, ku si pasojë e përplasjes së automjetit me motomjetin ka ndërruar jetë shtetasja F.B dhe ndodhet në gjendje të rëndë në spital shtetasi B.B
Në vendngjarje kanë shkuar shërbime të shumta të Policisë dhe Forca Kombëtare e Sigurisë Njësia Shkodër, si dhe janë nisur në ndihmë 2 grupe të Repartit Special “RENEA”.
Është ngritur një grup i posaçëm hetimor dhe në drejtimin e Prokurorisë vijojnë intensivisht hetimet për zbardhjen e rrethanave dhe sigurimin e provave, me qëllim dokumentimin ligjor të rastit, identifikimin dhe kapjen e autorëve.
Po në ndihmë të grupit hetimor është nisur dhe Drejtori i Departamentit të Policisë Kriminale me një grup specialistësh të Drejtorisë për Hetimin e rimeve të Rënda
Ndërkohë, shërbimet e Policisë kanë rrethuar zonën dhe vijojnë kontrollet në terren dhe në ambiente të ndryshme, si dhe kanë ngritur pika kontrolli, për të bërë të mundur kapjen e autorëve”, njofton policia.
