Janë zbardhur detaje të reja nga ngjarja e rëndë e regjistruar paraditen e kësaj të mërkure në Maliq, ku pas konfliktit në një familje, babai plagosi me thikë të birin 15-vjeçar.
Burime bëjnë me dije se autori i ngjarjes është shtetasi Shpëtim Çuka, i cili është shoqëruar në komisariat. Mësohet se para uniformave blu ai ka dëshmuar se arsyeja e sherrit me të birin, ishte për shkak se ky i fundit nuk kishte shkuar në shkollë.
“Me djalin u konfliktova se nu k donte të shkonte në shkollë,unë i thoja ikë se vajti ora,ai rrinte në telefon.Ishim duke u grindur sepse nuk po më dëgjonte,nuk donte të shkonte në shkollë. I thashë disa herë dhe më pas kisha një biçak në dorë dhe e godita.”, tha Shpëtim Çuka.
Ngjarja ka ndodhur rreth orës 10:45, në fshatin Vreshtas. 15-vjeçari është dërguar i plagosur në spital, ku po merr mjekim dhe është jashtë rrezikut për jetën.
Grupi hetimor po punon për zbardhjen e plotë të rrethanave të ngjarjes.
