Kristi Agron Balukja është i riu që humbi jetën mëngjesin e sotëm në qytetin e Elbasanit, në lagjen “Shënkoll”. Ai tentoi ti vendosë tritol makinës së 40-vjeçarit Renato Çepës, por sasia e eksplozivit i ka plasur në dorë duke i marë jetën menjëherë.
Atentatorit, 25 vjeç, i shpërtheu aksidentalisht sasia e eksplozivit në dorë në momentin kur do e vendoste dhe siç shihet në foton e mësipërme, automjeti “Volkswagen” i Çepës është dëmtuar në pjesën e përparme.
I riu mbeti i plagosur dhe u transportua me urgjencë në spital, por fatkeqësisht nuk ka arritur dot t’u mbijetojë plagëve të marra dhe ndërroi jetë.
Sipas policisë Renato Çepa njihet në Elbasan dhe si “Kel Llumi”.
Sipas burimeve policore mes viktimës dhe objektivit që ju vendos tritol disa kohë më parë ka pasur një konflikt fizik.
Ngjarja e sotme besohet shumë se lidhet pikërisht me këte konflikt të ndodhur disa kohë më parë mes Renato Çepa dhe Kristi Balukja.
“Në vijim të informacionit të dhënë mëngjesin e sotëm, ku si pasojë e shpërthimit të lëndës eksplozive, gjatë vënies së saj, në automjetin tip “Volkswagen” në pronësi të shtetasit R. Ç., në lagjen “Shënkoll”, ishte dëmtuar autori, i cili humbi jetën në spital, ju informojmë se pas verifikimeve të kryera, është identifikuar ky shtetas, konkretisht K. B., 25 vjeç, banues në Elbasan.
Nga hetimet e deritanishme ka rezultuar se 25-vjeçari, për shkak të një konflikti të vjetër, për motive të dobëta, mëngjesin e sotëm, ka vënë lëndë eksplozive në automjetin e shtetasit R. Ç.
Lënda eksplozive ka shpërthyer gjatë vënies dhe si pasojë 25-vjeçari ka humbur jetën, në spital.“- njofton policia.
Një grup i posaçëm hetimor, i përbërë nga strukturat hetimore të DVP Elbasan dhe të Komisariatit të Policisë Elbasan, si dhe nga ekspertë të Departamentit të Policisë Kriminale në DPPSH, në drejtimin e Prokurorisë, vijon punën pët të zbardhur të gjitha rrethanat e këtij rasti.
Lidhjet e Renato Çepës me personazhe të njohur të botës së krimit
40-vjeçari Renato Çepa, i njohur ndryshe si “Kel Llumi”, është një person me precedent penal në fushën e lëndëve narkotike.
Po kështu 40-vjeçari rezulton i skeduar nga policia për lidhje me të ndjerin Emiljano Ramazani të vrarë katër vite më parë si edhe me personazhe të tjera të botës së krimit.
Emiljano Ramazani ka qenë një eksponent i dalluar i krimit në qytet, që njihej për lidhjet e tij me trafikun dhe shpërndarjen e lëndëve narkotike. Ai u qëllua për vdekje, më 20 korrik 2020, vetëm pak sekonda pasi ishte ndalur me makinën e tij në sheshpushimin e pallatit ku banonte në vendin e njohur si ‘Rrethrrotullimi i Luleve’ në Elbasan.
