Anija e ngarkuar me 2100 tonelata mbetje industriale që dyshohet se përmbajnë lëndë të rrezikshme mbërriti në portin e Durrësit sot rreth orës 07:30.
Ngarkesa që besohet se përmban mbetje nga hiri i oxhaqeve metalurgjike, ishte nisur nga Shqipëria në korrik të këtij viti me destinacion Tajlandën e cila e refuzoi atë pas alarmit të dhënë nga organizata joqeveritare ‘Rrjeti i Aksionit të Bazelit’ me seli në Seattle, të Shteteve të Bashkuara.
Analisti, Enton Abilekaj u shpreh se shqiptarët janë në një errësirë total të cilën qeveria e ka zgjedhur me qëllim të mos mbajë përgjegjësi.
“Që nga momenti kur u denoncua, dhe deri sot, ne nuk e dimë çfarë mund të ketë ndodhur pasi qeveria shqiptare nuk pranon asnjë lloj përgjegjësie. Ne dimë shumë mirë se ka kompani shqiptare si Sokolaj, që janë angazhuar me eksportin e këtyre mbetjeve, por nuk e dimë si ka ndodhur dhe çfarë përmbajnë.
Ne jemi në një errësirë total të cilën qeveria e ka zgjedhur me qëllim të mos mbajë përgjegjësi. Duhet të kishte filluar hetimi, për interesat e vendit tonë, pasi ky krim po bëhet në territorin shqiptar.
Është e qartë që kemi të bëjmë më një krim mjedisor, në dëm të qytetarëve shqiptar, i ndodhur në mes të Shqipërisë, pra në Durrës“, tha Abilekaj per Syri tv.
