Policia e Tiranës ka dalë me një komunikatë të dytë në lidhje me alarmin e ngritur ditën e premte nga një mësuese në shkollën 9-vjeçare në kryeqytet, e cila pretendon se një lloj çamçakëzi vendos në përgjumje nxënësit.
Blutë e kryeqytetit bëjnë me dije se pas kontrolleve të ushtruara në shkollën 9-vjeçare në Yzberisht, kanë sekuestruar një tabletë në ngjyrë jeshile.
Sipas autoriteteve, nga analizat përkatëse në sektorin e toksikologjisë pranë ISHP, është arritur në përfundimin që ajo tabletë nuk ka prani të ndonjë lënde psikotrope dhe rezulton të ketë në përbërje vitaminë E.
Njoftimi:
Në vijim të njoftimit të dhënë ditën e premte, më datë 25.10.2024, për një substancë në formë tableti, në ngjyrë jeshile, që dyshohet se përgjum fëmijët, ju njoftojmë se:
Në vijim të kontrolleve të ushtuara, në një shkollë në Yzberisht është sekuestruar një tabletë në ngjyrë jeshile dhe nga analizat përkatëse në sektorin e toksikologjisë pranë ISHP, është arritur në përfundimin që nuk ka prani të ndonjë lënde psikotrope dhe rezulton të ketë në përbërje vitaminë E.
Pavarësisht këtij rezultati të nxjerrë, strukturat e Policisë do të vazhdojnë kontrollin dhe monitorimin në të gjitha shkollat.
