Nënkryetari i Partisë Demokratike dhe njëkohësisht deputeti i qarkut Durrës për PD-në, Oerd Bylykbashi, shprehet se nuk ka shqiptar dhe agjenci ligjzbatuese shqiptare apo e huaj që nuk e di se çfarë shtrati i nxehtë për krimin e organizuar është qyteti i Durrësit.
Çështja lidhet me ngarkesën e madhe të kontejnerëve të mbushur me mbetje të rrezikshme ,që sipas burimeve do të mbërrijë në Durrës në orët e para të mëngjesit të nesërm.
Në këtë kontekst, Bylykbashi theksoi se informatat e para lidhur me ngarkesën ishin për sot, por që në mënyrë të papritur mbërritja është shtyrë për nesër. Ai nënvizoi se ky ndryshim i papritur ngjall dyshime, duke shtuar një tjetër pikëpyetje për mënyrën e menaxhimit të këtij rreziku të madh. Deklarata e tij përmend mungesën e plotë të transparencës që e ka shoqëruar të gjithë këtë proces, një mungesë e cila, sipas tij, përbën një problem të thellë dhe një shqetësim serioz për qytetarët.
Për të përforcuar qëndrimin e tij, Bylykbashi rikujtoi një paralajmërim që kishte bërë në parlament vite më parë, në vitin 2014-2015, ku e përshkroi Durrësin si kryeqytetin e krimit të organizuar. Sipas tij, situata e tanishme është një provë konkrete e përshkallëzimit të këtyre aktiviteteve kriminale dhe mungesës së përkushtimit të autoriteteve për të siguruar transparencë dhe për t’i informuar qytetarët për ngjarjet që kanë ndikim të madh në jetën e tyre.
Ai theksoi faktin se mbetjet që do të mbërrijnë në Durrës kanë qenë të refuzuara nga shtete të tjera, duke ngritur pyetje të rëndësishme për sigurinë dhe përkushtimin ndaj interesit publik.
“Ajo që dimë deri në këtë moment është që anija me këta konteinerë, që përmbajnë mbetje të rrezikshme dhe helme, vjen nesër në mëngjes.
Fillimisht, mbërritja ishte njoftuar të paktën nga informacionet fillestare për sot, por tashmë flitet se do të jetë nesër në mëngjes. Gjithsesi, kjo ndryshon paksa fatin e këtij rreziku të madh që po i afrohet qytetarëve të Durrësit dhe më gjerë.
Një nga problemet më të mëdha të kësaj çështjeje, kësaj afere të rëndë, është mungesa totale e transparencës. E gjitha ka nisur dhe është zhvilluar në mungesë transparence dhe në fshehtësi, që shqiptarët të mos dinin se diçka e tillë po ndodhte. Tani që po vjen, askush nuk e di me saktësi të plotë se çfarë lloj ngarkesash helmuese po vijnë në portin e Durrësit dhe çfarë fati do të kenë më pas. Rreziku që këto mbetje të largohen prej aty fshehurazi apo në çfarëdo forme tjetër është i lartë. Gjithashtu, ekziston mundësia që të shpikët një histori për të justifikuar groposjen e tyre diku, me pasoja të rënda.
Arsyeja pse shtete të tjera i kanë refuzuar këto mbetje duhet të shqetësojë çdo qytetar të Durrësit dhe të Shqipërisë, për shkak të fatkeqësisë së mundshme që këto mbetje të groposen në zonat përreth, duke helmuar tokën, ambientin, ajrin, ujin, etj., me pasoja të rënda.
Po të mos ishte Rrjeti i Bazelit, askush nuk do ta merrte vesh këtë situatë dhe do të përballeshim me një gjendje shqetësuese, ku shumë mund të ndodhte dhe askush të mos e merrte vesh.
E kam thënë diku rreth viteve 2014-2015 në parlament se Durrësi është kryeqyteti i krimit të organizuar. Në atë kohë, ministri Klosi, i deleguar për Durrësin nga Partia Socialiste, tha: “Po ç’është kjo?” Por sot e kemi provë. Nuk ka durrsak që nuk e di këtë, nuk ka shqiptar që nuk e ka marrë vesh, dhe nuk ka agjenci ligjzbatuese shqiptare apo e huaj që nuk e di se çfarë shtrati i nxehtë për krimin e organizuar është qyteti i Durrësit, dhe sidomos çfarë baseni peshkaqenësh të krimit të organizuar dhe të korrupsionit është porti i Durrësit.”– u shpreh Bylykbashi në Syri TV.
