“El Clasico” mes Real Madrid e Barcelona rezultoi të ishte edhe njëherë spektakolare, me 90 minutat që panë plot 4 gola të shënuar, të gjithë në favor të skuadrës së flick.
Kylian Mbappe tundi rrjetën i pari me francezin që shënoi në minutën e 30’-të, për t’i dhënë avantazhin skuadrës së tij, por pas një rishikimi të aksionit me anë të sistemit VAR, aksioni rezultoi i parregullt, pas një pozicioni jashtë loje të sulmuesit gjatë ndërtimit të aksionit.
Ky ishte “takimi” i fundit i “Galaktikëve” me rrjetën.
Pjesa tjetër e sfidës u dominua totalisht nga “Katalanasit” e Barcelona, me Robert Lewandowskin, i cili hapi siparin e golave me një dopietë në minutat 54’ e 56’, dhe për t’u vazhduar më pas nga Lamine Yamal e Raphinha, me rrjetat e tyre në të 77’-n e 84’-tën minutë.
Falë këtij rezultati, djemtë e Hansi Flick ngjiten në kuotën e 30 pikëve, teksa vijojnë të kryesojnë tabelën e LaLiga, kësaj here me plot 6 pikë diferencë nga rivalët e përjetshëm të Real Madrid, të cilët kanë grumbulluar deri më tani 24 pikë.
