Analisti Lorenc Vangjeli thotë se Ilir Meta nuk i është shmangur asnjëherë hetimit të tij, ndaj ishte i panevojshëm ai ekspozim brutal force në bulevard.
Sipas Vangjelit, arrestimi i dhunshëm i Metës ishte tërësisht e papranueshme, jo profesionale dhe anti-qytetare.
“Më duhet të them diçka për mënyrën se si u bë, pasi zakonisht ndodh që edhe forma të ndikojë mbi thelbin. Forma që pamë atje, ishte tërësisht e papranueshme, jo profesionale dhe anti-qytetare.
Është një hije më shumë, në një proces që pritet të jetë I mbushur me dritëhije.
Është e paqartë dhe e pakuptimtë se çfarë fitohet në atë mënyrë, ku gjithçka mund të kishte ndodhur krejt ndryshe. Zoti Meta, nuk I është shmangur asnjëherë hetimit të tij, duke shtuar dhe personalitetin e tij, pra të gjitha këto e bëjnë të panevojshëm atë ekspozim brutal force në bulevard.
U bë gati 8 vite nga fillimi I reformës në drejtësi, sot, do them shkurt se çfarë mund të bëjmë një lloj rezymeje, duke parë dhe atë çfarë ndodhi me zotin Meta.
Shikojmë se njerëzit më të fuqishëm në pushtet, ata të cilët e kanë të shënuar emrin në listat e SPAK, e dinë që kanë çështje të hapura.
Të ndëshkosh nuk do të thotë të japësh drejtësi, dhe ne jemi larg organit drejtësi. Sistemi ynë i ri i drejtësisë, po tregohet gjithmonë e më tepër represiv, ndëshkues, por jo provues.”– tha Vangjeli në “Çim Peka Live”.
