Detaje të reja janë mësuar nga shpallja në kërkim e bashkëpunëtorit të ish-deputetit të PS-së Jurgis Çyrbja, Altin Hajri. Ky i fundit konsiderohet si një personazhet më në zë të botës së krimit në Durrës, teksa rezulton si personi që ka organizuar rrëmbimin dhe zhdukjen e Jan Prengës.
Ish-deputeti akuzohet se ka strehuar në banesat dhe pronat e tij të kërkuarin Hajri dhe kjo duket se është zbuluar nga komunikimet në platformën e koduar SKY ECC, që ka shërbyer si provë, bashkë me materiale të tjera të siguruara nga prokurorët.
Policia dhe BKH nuk ekzekutuan dot masën ndaj tij, pasi nuk u gjet gjatë kontrolleve të djeshme (20 tetor). Hajri bëhet kështu personi i tretë i dosjes dhe SPAK pritet të sqarojë detaje të tjera shtesë për pozicionin e tij në çështje dhe lidhjet me ish-deputetin socialist të qarkut Durrës, i cili ishte i treti i listës dhe u zgjodh për mandat në vitin 2017.
Çyrbja akuzohet për tregtim të sekretit shtetëror, përkrahje të autorit të krimit dhe korrupsion zgjedhor, lidhje me grup kriminal dhe komunikime në SKY ECC. Bashkë me të u arrestua mbrëmë edhe Ahmet Masha, një tjetër personazh i njohur për drejtësinë.
Kujtojmë se në shtator të këtij viti, Gjykata e Posaçme vendosi kalimin për gjykim të çështjes në ngarkim të Altin Hajrit. Ky i fundit akuzohet për rrëmbimin dhe zhdukjen e Jan Prengës, në 17 Janar të vitit 2020.
Hajri është gjykuar në mungesë, pasi nuk ishte bërë e mundur gjetja e tij, bashkë me Gramoz Rexhepin dhe Dritan Funiqin, të tre të cilësuar si organizatorë të rrëmbimit, me motiv konfliktet për shkak të grabitjes së një sasie me 260 kg kokainë në Angli, nga vëllai i Janit.
Trupi i këtij të fundit nuk është gjendur ende dhe cilësohet i vdekur, pasi u torturua për vdekje në ambientet e kompleksit “Golden” pas rrëmbimit dhe më pas trupi u zhduk. Kompleksi është në pronësi të familjes Hajri. Altin hajri dhe vëllai i tij kanë qenë të hetuar në Itali dhe akuzuar për narkotrafik dhe organizatë kriminale.
