Drejtuesit e Partisë së Lirisë kanë dalë në një konferencë të jashtë zakonshme për mediat pas arrestimit të kreut të kësaj force politike, ish-presidentit Ilir Meta.
I pari që mori fjalën ishte Tedi Blushi, i cili dënoi këtë akt terrorist, siç e konsideroi ai, pasi sipas tij, kriminelët me uniformë kanë rrëmbyer ish-kryeministrin, ish-kryetarin e Kuvendit dhe ish-Presidentin.
Ai theksoi se Meta ishte me imunitet dhe duhet të mbrohej nga Garda, por i tradhëtua edhe prej këtyre të fundit. Blushi shtoi më tej se që nga ky moment, autorët e këtij akti e kanë personale me gjithë shqiptarët e ndershëm.
“Dënojmë me ashpërsinë më të madhe këtë akt terrorist të pashembullt. Sot në bashkëpunim me forcat, apo kriminalet nënuniformë, kryen një nga krimet më të pashembullta në republikën e Shqipërisë duke rrëmbyer ish-kryeministrin, ish-kryetarin e Kuvendit dhe ish-Presidentin. Edhe pse me imunitet dhe gjoja nën mbrojtje nga Garda, i tradhtuar edhe prej tyre, u rrëmbye nga dhjetëra kriminelë nën uniformë. Që nga ky moment e kanë personale me gjithë shqiptarët e ndershëm.
Kanë marrë përsipër një detyrë që vetëm, banditë dhe kriminelë që mund ta bëjnë. Më e rëndë akoma është dhuna fizike që kanë ushtruar ndaj tij, duke kënaqur egon e Edi Ramës.” – tha Blushi.
Ai u shpreh se akti i sotshëm është një shpallje lufte ndaj opozitës, e cila nga dita e sotme i ka dy nga drejtuesit e saj të arrestuar politikisht. Blushi tha se tejkalimi i çdo vije të kuqe do të marrë përgjigjen e popullit opozitar dhe shqiptarëve të ndërshëm nga të 4 anët e Botës.
