Milani i është kthyer fitoreve në kampionat, duke mposhtur jo pa vuajtje Udinezen në “San Siro” në një ndeshje ku i shpëtoi VAR-i në minutat e fundit të duelit.
Goli i vetëm i sfidës erdhi në minutën e 13’-të, nga Samuel Chukwueze, ndërsa që nga minuta e 29’-të, Milan luajti me 10 lojtarë pas daljes me kartonin e kuq të holandezit të mesfushës, Tijjani Reijnders.
Megjithatë duhet thënë se ndikim të madh në këtë sfidë pati edhe sistemi VAR, me dy gola të anulluar të lojtarëve të Udinese, fillimisht atë të Ehizibue, në fundin e pjesës së parë e më pas golin e belgut Christian Kabasele, në sekondat e fundit të lojës.
Falë këtij rezultati Milan ngjitet në vendin e tretë të Serie A, me 14 pikë, po aq sa Inter i vendit të dytë dhe vetëm 2 pikë më pak se Napoli kryesuese, ndërsa Udinese ndodhet në vendin e 6-të me 13 pikë
