Policia e Tiranës ka arrestuar një tjetër person në lidhje me magazinën ku kultivohej kanabis të zbuluar më 10 tetor në rrugën “Hamdi Pepa” në zonën e Selitës në kryeqytet.
Raportohet se në pranga është vënë shtetasi Klestjan Hala, 36 vjeç, banues në Tiranë, mbi të cilin rëndon akuza për veprën penale “Kultivimi i bimëve narkotike”, kryer në bashkëpunim.
Më herët uniformat blu kanë arrestuar dhe 4 persona të tjerë, shtetasit Erlind Tresa, Reshit Tresa, Asqeri Likaj dhe Elvis Lala, si dhe tre punonjësit e OSHEE-së, Ervis Pashollari, Elton Cenaliu dhe Gëzim Gjonpali. Në kërkim është shpallur shtetasi Saimir Karaj.
Sipas autoriteve policore, të akuzuarit kishin përshtatur një tunel, nga kati i parë në katin e dytë të magazinës, për kultivimin e bimëve narkotike me anë të llambave.
Gjatë zhvillimit të operacionit blutë e kryeqytetit kanë gjetur brenda magazinës 193 bimë kanabis të kultivuara në vazo, 100 bimë të thara të futura nëpër thasë, llamba elektrike, ventilatorë, tuba plastikë, pajisje aspirimi, filtra, bobina dhe sende të tjera që shërbejnë për kultivim bimësh narkotike me anë të llambave.
Materialet proceduriale i kaluan Prokurorisë së Tiranës për veprime të mëtejshme.
