Pas ndeshjeve të kombëtareve, në fundjavë do të rikthehen sërish kampionatet e klubeve, ku në Shqipëri do të luhet java e nëntë e Kategorisë Superiore.
Edhe këtë sezon vijojnë problematikat e sezoneve të kaluara me stadiumet, ku disa prej klubeve u duhet “të shtegëtojnë” në qytetet të tjera për të zhvilluar ndeshjet që i konsderojnë si “në shtëpi”.
Së fundmi raportohet se edhe derbi i kryeqytetit Tirana-Dinamo, e programuar për t’u zhvilluar ditën e shtunë në orën 17:00, nuk do të luhet në stadiumin “Air Albania”.
Federata Shqiptare e Futbollit ka vendosur të “kyçë” stadiumin kombëtar për klubet, për të mbajtur në gjendje të mirë fushën për Kombëtaren, e cila luan më 16 dhe 19 nëntor në Ligën e Kombeve.
Vendimi ende nuk është marrë zyrtarisht për derbin Tirana-Dinamo, teksa deri dje në mbrëmje situata ka qenë kaotike, ku po shihen disa mundësi të tjera për ta luajtur, siç janë stadiumet e Lushnjës, Vlorës dhe Burrelit.
Për stadiumin “Roza Haxhiu” ka pak shanse, sepse fusha nuk është në gjendje të mirë dhe dy skuadrat nuk dëshirojnë të luhet aty. Stadiumi i Burrelit, edhe pse është përmendur si opsion, ka një përqindje të ulët që të miratohet, kështu që me shumë mundësi, nëse nuk miratohet “Air Albania”, atëherë Tirana-Dinamo do të luhet në Vlorë dhe vetëm emrin do të ketë “derbi i kryeqytetit”.
