Deputetët e Partisë Socialiste me urdhër të kryeministrit Edi Rama janë kthyer në një mburojë për deputeten Olta Xhaçka, duke votuar dy herë kundër vendimit të Gjykatës Kushtetuese për të shqyrtuar mandatin e saj, teksa herën e fundit abstenuan dhe i kërkuan opinion Komisionit të Venecias për ta zvarritur çështjen.
Xhaçka akuzohet nga opozita se është në konflikt interesi, duke përfituar të mira publike, për shpalljen e bashkëshortit të saj, Artan Gaçi investitor strategjik nga Qeveria në kohën kur ajo ishte ministre e Jashtme.
Rasti është kthjellësisht i pastër dhe për precedentë të tillë Kushtetuesja i ka hequr më parë mandatin e deputetit, Ilir Beqjas dhe Koço Kokëdhimës.
Por, sipas deputetit socialist, Erion Braçe, Kushtetuesja është treguar joserioze me këtë çështje pasi e pranoi padinë e 25 deputetëve, e shqyrtoi dhe më pas e ktheu në parlament. Jo vetëm për këtë rast, por sipas Braçes, Kushtetuesja është treguar jo serioze edhe për rastin e taksimit të profesioneve të lirë.
Pra, socialistët sulmojnë drejtësinë dhe iu duket jo serioze vetëm për rastet kur vepron kundër tyre. E në fakt, Braçe ka të drejtë kur thotë se Gjykata Kushtetuese është jo serioze, por jo në atë kuptim që shprehet ai, por se gjyqtarët e Kushtetueses janë kthyer në “shërbëtorë” të Qeverisë, duke marrë një sërë vendimesh pro Ramës.
Madje, edhe në rastin e taksimit të profesioneve të lirë kjo gjykatë u tregua qesharake, jo për shkak se e rrëzoi ligjin, por se vendosi pro Qeverisë për mos rimbursimin e profesionistëve të lirë nga një taksim i padrejtë.
“Kushtetuesja duhet të jetë serioze. Ajo e pranoi padinë e bërë nga 25 deputetët dhe e shqyrtoi. Më pas tha se e do nga parlamenti. Vota ime është e imja. Deri në momentin që unë të bindem që Kushtetuesja është serioze, patjetër që do ta çoj në Komisionin Venecias. Në gjykimin tim, kjo gjykatë për këtë çështje është treguar joserioze. Ka edhe një çështje tjetër ku nuk është treguar serioze për Tatimin për Profesionet e Lira. Kjo nuk mund të jetë serioze, 9 anëtarë u bënë copa copa për të bërë një qokë. Duhet të marrin vendime të qarta. Nuk po flasim për akuzë penale për Xhaçkën, por për çështjen e mandatit.”, tha Braçe në A2 CNN.
