Deputeti i PD-së, Ervin Salianji ka zgjedhur që të vetëdorëzohet në Drejtorinë e Policisë së Tiranës, pas dënimit që iu dha ditën e djeshme nga Gjykata e Apelit, për shkak se i prishi imazhin Qeverisë duke denoncuar Geron Xhafajn, vëllain trafikant droge të ish-ministrit Fatmir Xhafaj.
Grupi parlamentar i PD-së kishte vendosur që ai të mos dorëzohej, duke e konsideruar si një dënim politik dhe të padrejtë, duke u ngujuar në selinë blu, por Ervin Salianji nuk iu është bindur vendimit të kolegëve dhe ka vendosur të vetëdorëzohet.
Këtë gjë e ka konfirmuar edhe kreu i grupit parlamentar të PD-së, Gazment Bardhi, i cili deklaroi për mediat se janë të detyruar që të pranojnë vullnetin e Salianjit.
Deputeti demokrat do të shkojë në Drejtorinë e Policisë së Tiranës në orën 17:00, teksa Partia Demokratike u ka bërë thirrje strukturave që të mblidhen aty.
Mesazhi i PD-së drejtuar strukturave:
Përshëndetje, të nderuar miq, ju bëj me dije këtë lajm urgjent.
Ditën e sotme, në orën 17.00 të mblidhemi para Drejtorisë së Policisë( tek Myslym Shyri) në mbrojtje të deputetit Ervin Salianji.
Goditja që I bëhet Salianit është goditje që I bëhet të gjithë qytetarëve të këtij vendi.
Mirë u takofshim
