Deputetja e Partisë së Lirisë, Monika Kryemadhi ka reaguar për dënimin politik të deputetit demokrat Ervin Salianji, pasi ky i fundit denoncoi publikisht lidhjet e vëllait të ish-ministrit të Brendshëm, Fatmir Xhafaj, Geron Xhafaj, si trafikant i lëndëve narkotike dhe dënimin e tij në Itali.
Në një postim në Facebook, Kryemadhi thekson se absurditeti po vendoset tashmë edhe me gjykatë, përmes vendimeve me llogjikë politike dhe jashtë çdo norme proporcionaliteti.
“Jo vetëm fjala e lirë, jo vetëm denoncimi dhe hedhja dritë mbi të vërtetën, por çdo gjëje që prek stabilitetin kriminal mund t’i shpallet luftë duke përdorur mekanizmin shtetëror dhe ligjor”, shkruan Kryemadhi ndër të tjera.
Postimi i plotë:
Absurdi po vendoset tashmë edhe me gjykatë, përmes vendimeve me llogjikë politike dhe jashtë çdo norme proporcionaliteti.
Jo vetëm fjala e lirë, jo vetëm denoncimi dhe hedhja dritë mbi të vërtetën, por çdo gjëje që prek stabilitetin kriminal mund t’i shpallet luftë duke përdorur mekanizmin shtetëror dhe ligjor.
Burgosja për ushtrimin e detyrës në mbrojtje të interesit publik nuk ka vend në demokraci. Kjo vlen për deputetin e zgjedhur, zyrtarin publik, gazetarin e medias dhe këdo qytetar pa dallime.
