Sipas deputetit të PD-së, Dashnor Sula, ditën e sotme u rikthyen dënimet politike, duke iu referuar dënimit të deputetit Ervin Salianji nga Apeli me 1 vit burgim.
Në një postim në rrjetet sociale, Sula shkruan se vendimi i sotëm është një mesazh për të vrarë kurajon/guximin e atyre që denoncojnë pushtetarët e inkriminuar, teksa e konsideron dhe si një këmbanë alarmi për demokracinë.
Deputeti demokrat shton më tej se Partia Demokratike dhe opozita nuk duhet të pranojnë të nënshtrohen nga vendimet politike, por duhet të ngrihen përballë kësaj arrogance të qeverisë.
Postimi i Sulës:
Sot u rikthyen dënimet politike!
Dënimi i deputetit Ervin Salianji është vendim politik. Ky është një mesazh për të vrarë kurajon/guximin e atyre që denoncojnë pushtetarët e inkriminuar.
Është fakt që vëllai i ish-ministrit të brendshëm u fut në burg në Itali pas denoncimit të Salianjit. Është fakt i njohur botërisht që derisa u bë denoncimi nga PD, vëllai i ish-ministrit lëvizte i lirë madje edhe duke bërë biznes në Shqipëri. Por gjykatat dënojnë deputetin e opozitës që denoncon.
Kur kjo ndodh me një deputet që përfaqëson minimalisht 10 mijë qytetarë, e kuptoni çfarë ndodh me një qytetar të vetëm?!
Vendimi politik i marrë ndaj deputetit demokrat, Drejtuesit politik të qarkut të Elbasanit, Ervin Salianji është një kambanë alarmi për demokracinë në vend.
Partia Demokratike dhe opozita nuk duhet të pranojnë të nënshtrohen nga vendimet politike.
Qytetarët dhe opozitarët duhet të ngrihen përballë kësaj arrogance të qeverisë dhe të ndalojnë shkatërrimin e demokracisë në Shqipëri
