Deputetja demokrate Jorida Tabaku, në një video të publikaur në Facebook, ka komentuar mbi çështjen e taksimit të profesionistëve të lirë.
Tabaku, e cila ka ndjekur nga afër këtë çështje derisa u vulos me vendimin e Gjykatës Kushtetuese që shpalli taksimin e vendosur nga qeveria si antikushtetues, ka kritikuar Ministrinë e Financave për mungesën e vullnetit politik për të zbatuar vendimin dhe për të rimbursuar profesionistët e lirë që tashmë janë prekur nga ky taksim i padrejtë.
Deputetja thekson se këto para u takojnë ligjërisht profesionistëve dhe u bëri thirrje autoriteteve që të mos e banalizojnë më tej këtë çështje.
“Sot të gjithë shqiptarët e dinë se taksa e profesionistëve të lirë ishte antikushtetuese dhe e padrejtë”, deklaroi Tabaku, duke kërkuar një zbatim të plotë të vendimit të Gjykatës dhe një rimbursim të menjëhershëm për ata që janë prekur.
“Gjykata Kushtetuese e vulosi çështjen e profesioneve të lira duke marrë kërkesën e Ministrisë së Financave dhe duke mos e trajtuar fare. Këto diskutimet e Qeverisë shqiptare pa pikë serioziteti, më the, të thashë, do ja çojmë Gjykatës Kushtetuse për ta trajtuar sikur të jetë Gjykata Kushtetuese një drejtori varësie juridike e Ministrisë së Financave morën fund.
Tashmë kemi një vendim të qartë që Gjykata Kushtetuese ka vendosur që taksa e profesioneve të lira është antikushtetuese dhe e pandershme. Ministria e Financave duhet thjesht të ketë vullnetin politik që ta zbatojë atë. Nuk dinë sesi ta bëjnë? Kemi dorëzuar një propozim ligjor që merr parasysh që çdo profesionist i lirë i cili ka paguar tatimin që tashmë nuk është më në fuqi, duhet patjetër që të jetë një rimbursim. Nëqoftëse kanë vullnetin politik për ta bërë, atëherë ta bëjnë.
Të mos e banalizojnë më shumë këtë cështje, të mos e kthejmë shtetin edhe në një shtet qesharak që nuk është i aftë të kuptojë dhe një vendim të Gjykatës Kushtetuese e jo më ta zbatojë atë.Sot të gjithë shqiptarët e dinë se taksa e profesioneve të lira ishte antikushtetuese dhe e padrejtë. Ishte një betejë që ne të gjithë bashkë e fituam, tashmë duhet që ta çojmë këtë betejë deri në fund duke rimbursuar çdo para që është paguar nga këto profesionistë të lirë”, shprehet Tabaku.
