Një efektiv i seksionit të “Shiponjave” është shpallur në kërkim nga Agjencia e Mbikëqyrjes Policore, teksa për dy të tjerë është caktuar masa e sigurisë “detyrim paraqitje”.
Në kërkim është shpallur efektivi me inicialet R.B., 34 vjeç. Gjykata e Tiranës ka caktuar për këtë të fundit masën e sigurisë“Arrest në burg”, i dyshuar për veprën penale “Vrasje me dashje” e mbetur në tentativë, “Falsifikim dokumentash” dhe “Kallëzim i rremë”.
Gjithashtu, masa e sigurisë “Detyrim për t’u paraqitur në Policinë Gjyqësore” për efektivët Elton Dokollari, 46 vjeç dhe Florian Zeneli, 37 vjeç, të dy të dyshuar për veprat penale “Shpërdorim detyre”, i kryer në bashkëpunim, “Moskallëzim krimi”, “Falsifikim dokumentash” dhe “Veprime që pengojnë zbulimin e të vërtetës”.
Sipas Agjencis së Mbikëqyrjes Policore nga hetimet e Prokurorisë ka rezultuar se ata kanë qlluar me armë zjarri ndaj një automjeti në rrugën Tiranë–Fushë Krujë duke vënë në rrezik jetën e dy personave
“Caktimi i masave të sigurimit personal ndaj punonjësve të policisë u bë i mundur nga hetimet e kryera pas kallëzimit penal të depozituar nga një shtetas, nga ku rezultoi se në datë 8 mars 2024, gjatë kryerjes së shërbimit në segmentin rrugor Tiranë–Fushë Krujë, këta punonjës policie kanë ndaluar një automjet dhe gjatë veprimeve policore, në tejkalim të kushteve të mbrojtjes së nevojshme, kanë qëlluar me armën e shërbimit në drejtim të tij, duke vënë në rrezik jetën e dy personave që ndodheshin në mjet. Në vijim, krahas mos-raportimit të ngjarjes tek strukturat eprore, ata kanë tentuar të fshehin provat dhe faktet.” – thuhet në njoftimin e AMP-së.
