Një sulm izraelit në një shkollë që ishte transformuar për të shërbyer si strehë në Rripin e Gazës vrau të paktën shtatë persona, thonë zyrtarët palestinezë.
Ushtria izraelite tha se kreu një sulm të dielën mbi militantët e Hamasit që ishin strehuar në shkollë dhe i akuzoi ata për rrezikimin e civilëve.
Mbrojtja Civile, që operon nën qeverinë e drejtuar nga Hamasi – grupin palestinez të shpallur organizatë terroriste nga SHBA-ja dhe BE-ja – konfirmoi numrin e viktimave. Nuk u tha nëse ata që u vranë ishin luftëtarë apo civilë.
Shkolla ndodhet në Shati, një kamp refugjatësh i ndërtuar në Gaza City që daton nga lufta e vitit 1948. Forcat izraelite kanë ndërmarrë sulme të përsëritura atje gjatë luftës gati njëvjeçare me Hamasin.
Shkollat e Gazës u mbyllën pas sulmit të Hamasit më 7 tetor ndaj Izraelit, i cili nxiti luftën, dhe shumica e tyre janë shndërruar në strehë. Rreth 90 për qind e popullsisë prej 2.3 milionë banorësh të Gazës është zhvendosur.
Izraeli thotë se synon vetëm militantët dhe përpiqet të shmangë dëmtimin e civilëve, por rrallë komenton për sulme të veçanta, të cilat shpesh vrasin gra dhe fëmijë.
Lufta filloi kur luftëtarët e udhëhequr nga Hamasi vranë rreth 1.200 persona, kryesisht civilë, në një sulm më 7 tetor në Izraelin jugor. Ata rrëmbyen rreth 250 njerëz dhe ende mbajnë peng rreth 100. Fushata e Izraelit në Gaza ka vrarë të paktën 41.000 palestinezë, sipas Ministrisë së Shëndetësisë së Gazës, e cila nuk bën dallim në shifra midis luftëtarëve dhe civilëve./ REL
