Mundësia që pati një person i vetëm i armatosur që të qëllojë tetë herë drejt ish-Presidentit Donald Trump gjatë një aktiviteti elektoral në Pensilvani ishte pjesërisht rezultat i dështimeve të shumta nga agjentët që u ishte ngarkuar detyra e mbrojtjes së ish-presidentit.
Me këtë konkluzion ka dalë shërbimi seret. Në raportin për hetimin e brendshëm, identifikohen probleme me komunikimin dhe koordinimin, përpara tubimit të 13 korrikut në qytetin Butler, si dhe mbështetjen e tepruar tek agjencitë partnere të zbatimit të ligjit në nivel shtetëror dhe lokal.
“Nuk mund të heqim dorë nga përgjegjësitë, apo t’ua kalojmë ato të tjerëve”, u tha gazetarëve të premten në Uashington drejtori në detyrë i Shërbimit Sekret, Ronald Roëe.
Tentativa për vrasje tronditi pjesën më të madhe të Shteteve të Bashkuara dhe bëri që drejtorja e atëhershme e Shërbimit Sekret të jepte dorëheqjen.
Atentati u bë nga 20-vjeçari Thomas Matthew Crooks, i cili veproi i vetëm dhe që e konsideroi në mënyrë të papritur ish-presidentin si një objektiv të mundshëm.
Pavarësisht pranisë së truprojave që mbronin ish-Presidentin Trump, ekipeve pararojë të dislokuara dhe njësive lokale të zbatimit të ligjit, i dyshuari Crooks arriti të ngjitej në një ndërtesë me pamje nga tubimi dhe të pozicionohej me një pushkë të llojit AR, përpara se të zbulohej.
Të shtënat plagosën ish-Presidentin Trump dhe dy pjesëmarrës në tubim, si dhe vranë një të tretë. Shërbimi seret pritet të mbajë përgjegjësi për mangësitë në fjalë, por deri më tani mohohet njoftimi se disave i është kërkuar dorëheqja.
Publikimi i raportit të Shërbimit Sekret vjen më pak se një javë pas atentatin të dytë ndaj Donald Trump.
Pas atentatit të 13 korrikut ndaj ish-Presidentit Trump, Shërbimi Sekret i ka siguruar atij dhe kandidates demokrate për presidente, Nënpresidentes Kamala Harris, të njëjtin nivel mbrojtjeje si Presidentit Joe Biden.
