Sekretari i përgjithshëm i Partisë Demokratike, Flamur Noka, thotë se me “mburojën” për mandatin e Olta Xhaçkës mazhoranca bëri puç kushtetues dhe se zgjidhja e vetme për mbajtjen e zgjedhjeve të lira dhe të ndershme, është vetëm qeveria teknike.
Në një intervistë për MCN, Noka deklaroi se “rasti i investitores strategjike të Edi Ramës”, Olta Xhaçka është rasti më skandaloz që përfundimisht tregon që mazhornaca për të mbrojtur veten me interesat e Edi Ramës, është gati të shkelë çdo ligj.
Sipas tij, mos dërgimi i mandatit të Xhaçkës në Gjykatën Kushtetuese u bë me miratimin e “sulltanit të Surrelit”. Noka paralajmëroi edhe mosbindje civile nga ana e opozitës.
Flamur Noka: Ajo që mund të themi është se përfundimisht mazhoranca për të mbrojtur Kryeministrin dhe ministren, organizoi një puç Kushtetues. Vendimet e Gjykatës Kushtetuese janë të detyrueshme. Ditën e enjte mazhoranca varrosi përfundimisht reformën në drejtësi. Sepse reforma në drejtësi bëhet kur duan ata. Rama bën si të dojë, Edi Rama dirigjon gjithçka, është e paprecedentë gjithçka ajo që po ndodh.
Në rastin konkret treguan se kur duan për të sulmuar opozitën dhe liderin e saj i lëshojnë SPAK dhe gjithë hordhitë dhe kur nuk duan nuk konsiderojnë asnjë vendim gjykate. Që në këtë moment në Shqipëri është vështirë të flitet për drejtësi. Drejtësi politike po. Puçi kushtetues që organizoi mazhoranca të enjten, tregon se nuk ka reformë në drejtësi por Rama-formë. Opozita ka dy instrumente, ka fjalën dhe aksionin opozitar jashtë parlamentit.
Rasti i investitores strategjike Olta Xhaçka është një shtysë më e madhe për të vazhduar në një radikalizim të rrugës sonë drejt mosbindjes policie. Këtu në Shqipëri ka një narko-regjim, nuk ka një kryeministër demokrat, por ka një autokrat i cili duhet rrëzuar. Një njeri që ka kapur gjithçka. Shqipëria është marrë peng në çdo aspekt, në aspektin institucional dhe politik. Është marrë peng nga një njeri dhe ky njeri është marrë peng nga krimi i organizuar dhe narkotrafiku. Duhet të shpëtojmë demokracinë dhe pluralizmin nga pengmarrja.
Rasti i investitores strategjike Olta Xhaçka është tregues se vetëm qeveria teknike jep shpresë që shteti të funksionojë, institucionet të funksionojnë që balanca e pushteteve të respektohet dhe Shqipëria të ketë mundësi të bëjë zgjedhje të lira dhe demokratike. Ne jemi të vendosur në këtë rrugëtim. Shqiptarët kanë nevojë për një qeveri që ruan rolin e ekzekutivit, kanë nevojë për balancë pushtetesh dhe zbatim të ligjit.
Shqiptarët nuk kanë nevojë që votën tua caktojnë Ndokët, Rrajat. Shqipëria ka nevojë për një qeveri teknike. Është turp që mafia ndërkombëtare e drogës ka marrë peng demokracinë e këtij vendi. Ne jemi në prezantim të drejtuesve politik të të gjithë qarqeve. Drejtuesit politik së bashku me deputetët dhe krerët e degëve do jenë çdo ditë në kontakt me strukturat dhe qytetarët. Qytetarët kanë revoltë të brendshme, ata duhen takuar dhe orientuar. Që Shqipëria të ketë zgjedhje të lira dhe demokratike, kjo rrugë nuk ka kthim mbas.
