Egnatia ka reaguar vetëm pak ditë pas humbjes në Shkodër me Vllazninë, pasi ditën e sotme ka triumfuar me goleadë përballë Bylisit, në ndeshjen e luajtur në shtëpi për javën e 5-të të Kategorisë Superiore.
Rrogozhinasit arritën të shënonin 4 herë në portën e ballshiotëve, me nga dy gola për secilin fraksion loje.
Loja ishte me raste nga të dy ekipet deri në minutën e ’31 të takimit, ku Alessandro Ahmetaj arriti të zhbllokonte rezultatin dhe të shënonte golin e parë për vendasit dhe më pas ndeshja foli vetëm për Egnatian. Në minutën e ’36 ishte Xhemajli, ai i cili realizoi golin e dytë për vendasit, pas një goditje standarde, teksa me rezultatin 2-0 u mbyll edhe pjesa e parë e lojës.
E njëjta histori ishte edhe në pjesën e dytë, pasi në minutën e ’57 të takimit, Ahmetaj shënoi edhe dopietën e tij personale për këtë ndeshje dhe të tretin për ekipin e tij, teksa në minutën e ’69 të ndeshjes arriti të shënonte dhe Edison Ndreca për Egnatian.
Pavarësisht ndërrrimeve nga ana e trajnerit Edlir Tetova, sërisht Egnatia kishte edhe 3-4 raste të tjera shënimi, por që lojtarët gabuan shumë para portës së mbrojtur nga Hasanbelli.
Me këtë fitore Egnatia shkon në kuotën e 10 pikëve, teksa Bylisi qëndron në 5 pikë.
