Janë zbardhur detaje të reja nga ngjarja e regjistruar pasditen e kësaj të mërkure në Tiranë, ku një i riu përfundoi me motor në lumin e Lanës, pasi po ndiqej nga efektivët e Policisë, teksa mbeti i plagosur dhe u arrestua.
Burime për mediat bëjnë me dije se personi i arrestuar ishte në kërkim nga Krimi Ekonomik i Policisë së Tiranës pasi akuzohej për mashtrim.
Mësohet se janë të paktën 12 raste kur qytetarët e kishin denoncuar për këtë vepër penale. I riu pikaste të moshuarit, ku iu prezantohej si zyrtar i Bashkisë së Tiranës. Me premtimin se kanë përfituar grante nga bashkia, ai kishte arritur që t’i merrte të moshuarve nga 200 deri në 800 mijë lekë të vjetra.
Në tentativë për t’u larguar duke ecur me shpejtësi në trafik, ai ka humbur kontrollin dhe ka përfunduar në lumin Lana.
Raportohet se i riu ka marrë lëndime të lehta dhe ndodhet jashtë rrezikut për jetën, është arrestuar menjëherë në vendin e ngjarjes dhe është dërguar në spital për mjekim. Ende nuk dihet identiteti i të riut.
