Ndërmjetësuesi konfirmoi se letra mohuese serbe është tërhequr… Por Bashkimi Europian nuk jep asnjë detaj nëse Serbia ka hequr dorë ose jo nga qëndrimi për mos zbatimin e disa pikave të marrëveshjes së normalizimit me Kosovën.
“Nuk do të përsëris atë që Lajçak ka thënë. Mund të nënvizoj se qëndrimi zyrtar i BE-së dhe vendeve anëtare, i përcaktuar dhe në konkluzionet e Këshillit, është se Serbia dhe Kosova janë të detyruara të zbatojnë marrëveshjen e Ohrit, nëse dëshirojnë integrimin. Për ne kjo është përfundimtare dhe dokumenti është detyrues nën ligjin ndërkombëtar për Kosovën dhe Serbinë. Nuk ka nevojë për hapa shtesë për zbatimin e marrëveshjes. Ajo që keni nevojë tani është zbatimi i menjëhershëm dhe ky është një mesazh i përsëritur për Beogradin dhe Prishtinën nga Brukseli, kryeqytetet e vendeve anëtare të BE-së, gjithashtu edhe nga Uashingtoni”, tha Stano.
Stano shtoi se pa zbatimin e marrëveshjes së normalizimit dhe aneksit të Ohrit nuk do të ketë anëtarësim për asnjërën nga palët, madje as progres në rrugën e aderimit. Por Serbia e ka bërë të qartë, edhe nga kryeministri Millosh Vuçeviç se nuk ka në plan të zbatojë ujdinë.
Madje në parlament tha se qeveria e Beogradit e ka refuzuar atë që e konsideroi plani franko-gjerman. Vitin e kaluar, ish kryeministrja serbe, Ana Brnabiç, dërgoi një letër në Bruksel duke bërë të qartë se vendi i saj refuzonte pikat ku Serbia njihte de facto Kosovën dhe lejonte anëtarësimin në organizata ndërkombëtare.
Bashkimi Europian dhe Amerika kanë paralajmëruar masa ndaj palëve që e shkelin marrëveshjen në fjalë, por asnjë ndëshkim nuk ka deri më tani në drejtim të Beogradit, që me dhjetëra raste e ka refuzuar dhe shkelur ujdinë.
