SPAK ka ngritur akuzë zyrtare për shpërdorim detyre dhe fshehje pasurie për ish-kryebashkiakun e Himarës, Jorgo Goro.
Por, sipas sekretarit të Omonia-s Marin Suli, akuza ndaj Goros dhe bashkëpunëtorëve të tij duhet të ishte për grup të strukturuar kriminal.
Përmes një lidhje “Skype” me MCN, Suli tha se Jorgo Goro ka bërë çdo gjë me urdhrin e Olta Xhaçkës.
“Kjo tashmë është një drejtësi me regji dhe regjia është brenda grupit parlamentar të PS dhe regjisori quhet Edi Rama. Goro në bashkëpunim me disa të tjerë, duke qenë se një vepër kriminale kryhet në bashkëpunim me disa të tjerë nuk mund të shpërdorim detyre, është grup i strukturuar kriminal. Por kryetari i grupit të strukturuar kriminal është Olta Xhaçka me burrin e vet. Jam kurioz si grupi parlamentar i PS-së do i drejtohet Komisionit të Venecias dhe si do e fillojë letrën: I nderuar Komisioni i Venecias, na ndihmoni si të veprojmë në rastin kur gruaja ministre ndihmon burrin biznesmen të vjedhë 11 mijë metra katrorë tokë përmes një kryetari bashkie të PS-së.
E kemi thënë dhe disa herë tjetër, janë tjetër 11 mijë metra katrorë. 5 mijë e 200 janë të një shtetasi privat dhe 5 mijë të tjera është tokë publike. Këto Goro nuk i ka bërë vetëm, dhe nuk mund t’ i bënte sepse i lindi në shpirt që t’i falte dikujt 11 mijë katro. E ka bërë me urdhër politik nga Olta Xhaçka, i detyruar dhe në bashkëpunim me punonjës të bashkisë. Do të thotë që ata nuk kanë vepruar vetëm, por si grup i strukturuar kriminal.”
Po ashtu Suli hodhi akuza ndaj kryebashkiakut aktual të Himarës, Vangjel Tavos dhe tha se ai i ka dhënë Lenc Gjikurisë 23 mijë m/2 tokë në mes të qytetit pasi e ka ndihmuar të vjedhë zgjedhjet në Himarë.
“E njëjta skemë dhe për kryetarin e bashkisë në detyrë. Para pak ditësh, kryetari i bashkisë në detyrë sapo mbaruan zgjedhjet fali si padashje 23 mijë m/2 tokë një oligarku dhe tha se ishte tokë e papërdorur në mes të Himarës. Ia dha Lenc Gjikurisë sepse ai i ndihmoi të fitonin vjedhjet që bënë në Himarë.”
