Vajza e një francezi që po gjykohej për rekrutim të të huajve për të përdhunuar gruan e tij të droguar e ka përshkruar atë si “një nga kriminelët më të këqij seksualë në 20 vitet e fundit”, shkruan A2, referuar mediave ndërkomëbtare.
Pensionisti 71-vjeçar Dominique Pélicot, ka pranuar se ka abuzuar me gruan e tij pa dijeninë e saj midis viteve 2011 dhe 2020, duke e droguar me pilula gjumi dhe më pas duke rekrutuar dhjetëra të huaj për ta përdhunuar në shtëpinë e saj.
“Si duhet ta rimarrim veten kur e dimë” se çfarë bëri ai, tha vajza e tij, 45-vjeçarja Caroline Darian, e, duke folur në gjykatë në qytetin jugor të Avignon në ditën e pestë të çështjes që ka tmerruar Francën, raporton A2.
Pélicot mbante të dhëna të përpikta të abuzimit të gruas së tij, të cilat policia i zbuloi vetëm pasi u kap duke filmuar fundet e grave në një supermarket.
Për vite me radhë, gruaja e tij, Gisèle Pélicot, tani 71 vjeçe dhe me të cilën ai po kalon procedurat e divorcit, thotë se ishte e shqetësuar nga gabimet e çuditshme të kujtesës derisa u kontaktua nga policia.
Duke folur në gjykatë të premten në mëngjes, Darian tregoi se mësoi për abuzimin më 2 nëntor 2020 nga nëna e saj, pasi ajo kishte folur me hetuesit, shkruan A2.
“Jeta ime u kthye përmbys. Nëna ime tha: Kam kaluar pjesën më të madhe të ditës në komisariat. Babai yt më drogoi për të më përdhunuar me të panjohur. Unë u detyrova të shikoja fotot”, citon A2 vajzën e saj.
Darian në vitin 2022 shkroi një libër të quajtur “Et j’ai cesse de t’appeler papa” (“Dhe unë ndalova së thirruri baba”) për efektin që zbulimi i krimeve pati në familje.
Gisèle Pélicot ka kërkuar që gjyqi i bashkëshortit të saj të jetë publik për të rritur ndërgjegjësimin për përdorimin e drogës për të kryer abuzim seksual. Rasti ka tronditur Francën, me shumë komente dhe qarkullim të listës së të akuzuarve në internet.
