Një 28-vjeçar është arrestuar nga policia në Tiranë, pasi rezulton se drejtonte makinën nën efektin e drogës.
Policia bën me dije se i riu me iniciale D.D., u ndalua pasi u kap pa rrip sigurimi dhe më pas rezultoi se manifestonte sjellje të dyshimta.
“Shkon në 125 numri i drejtuesve të mjeteve që kanë rezultuar nën efektin e drogave, pas testimit me aparatin AquilaScan.
Drejtuesi i automjetit me iniciale D.D. 28 vjeç, është konstatuar pa vendosur rripin e sigurisë.
Ky shtetas ka manifestuar sjellje të dyshimta gjatë drejtimit të automjetit si dhe në raport me kërkesat ligjore të punonjësve të policisë, dhe nga verifikimi me drogtëstues rezultoi nën efektin e lëndëve droguese “THC”.
Sa më sipër, u bë menjëherë kapja dhe arrestimi në flagrancë e drejtuesit të automjetit si i dyshuar për veprën penale “Drejtim mjeti në mënyrë të parregullt”, parashikuar nga neni 291 i Kodit Penal të Republikës së Shqipërisë”, njofton policia
