Ish-presidenti amerikan Donald Trump ka ndezur sërish polemika duke sugjeruar se kryeministri kanadez Justin Trudeau mund të jetë djali i ish-liderit kuban, Fidel Castro.
Në një intervistë të fundit, Trump komentoi mbi thashethemet e vjetra, duke thënë: “Disa thonë se është djali i Fidel Castros, dhe mund të jetë e vërtetë.”
Trump gjithashtu përmendi se Margaret Trudeau, nëna e Justin Trudeau, kishte lidhje me shumë anëtarë të grupit Rolling Stones, një deklaratë që, sipas tij, edhe Mick Jagger e kishte përmendur gjatë një koncerti në Kanada.
Në librin e tij të fundit “Save America”, Trump e përmendi sërish këtë çështje, duke theksuar marrëdhënien e tij me Trudeau, të cilën e përshkroi si të mirë, por me disa dallime të dukshme në qasje.
Trump gjithashtu shprehu interes për të parë se si do të evoluojë marrëdhënia e tij me Trudeau në të ardhmen, duke theksuar se fillimisht duhet të rikthehet në Shtëpinë e Bardhë
Ai rikujtoi gjithashtu se Margaret Trudeau, në vitet 1970, kishte shoqëruar grupin Rolling Stones dhe se kishte patur një marrëdhënie të veçantë me Fidel Castron, të cilin ajo e kishte quajtur “mashkulli më seksi që kishte takuar ndonjëherë.”
Megjithatë, pretendimet e Trump janë kundërshtuar nga autoritete kanadeze dhe agjencia e lajmeve Associated Press, e cila ka bërë një verifikim të fakteve dhe ka konfirmuar se thashethemet janë të pabaza.
Sipas raportit, Justin Trudeau ka lindur në vitin 1971, nëntë muaj pas martesës së Margaret me kryeministrin Pierre Trudeau, dhe katër vite përpara se ajo të vizitonte Kubën për herë të parë. Këto thashetheme, megjithatë, fituan popullaritet pasi Trudeau shprehu admirim për Fidel Castron pas vdekjes së tij në vitin 2016, duke e cilësuar si një “revolucionar legjendar.”
