Policia e Himarës ka ndërmarrë një aksion për të liruar hapësirën publike në vijën bregdetare të plazhit të Krorëzës dhe si rezultat ka proceduar penalisht në gjendje të lirë 12 persona.
Sipas njoftimit të autoriteteve, ata akzohen se kishin zaptuar hapësirën publike duke ndërtuar pa leje 12 objekte të përshtatura si lokale/beach bar, nga ku ofroheshin shërbime dhe produkte pa lëshuar kupona tatimorë, duke fshehur të ardhurat dhe shmangur taksat. Gjithashtu uniformat blu kanë sekuestruar edhe 300 çadra dhe 480 shezlongë.
Personat që janë vënë nën hetim dhe për të cilët është referuar materiali në Prokurori janë 12 shtetasit: B. I., 34 vjeç, A. L., 34 vjeç, V. A., 34 vjeç, A. I., 71 vjeç, I. H., 51 vjeç, E. R., 52 vjeç, A. K., 62 vjeç, Dh. M., 51 vjeç, A. T., 44 vjeç, A. R., 68 vjeç, Dh. K., 69 vjeç dhe M. V., 25 vjeç, të gjithë banues në Sarandë.
“Shërbimet e Policisë, në bashkëpunim me Policinë Bashkiake Himarë, kanë konstatuar në hapësirën e zaptuar, në mënyrë të paligjshme nga këta shtetas, 12 struktura druri të ndërtuara pa leje, si dhe 300 çadra dhe 480 shezlongë të vendosura, të cilat janë hequr, duke liruar hapësirën publike në plazhin “Krorëz”.
Gjithashtu, nga verifikimet e kryera ka rezultuar se në këto subjekte me fushë veprimtarie lokal/beach bar, ofroheshin shërbime dhe produkte pa lëshuar kupona tatimorë.” – thuhet në njoftimin e Policisë
Materialet iu kaluan Prokurorisë për veprime të mëtejshme.
