Vonesa dhe lënia e gjërave në momentin e fundit është bërë një trend i zakonshëm tashmë në Shqipëri, teksa nuk ka mbetur pa u përfshirë edhe futbolli.
Jemi vetëm 3 ditë larg nisjes së sezonit të ri të Superiores dhe lidhur më të, janë disa problematika madhore, që nuk kanë marrë ende zgjidhje.
E para ka të bëjë me të drejtat e transmetimit ku tifozët janë konfuzë se ku do të ndjekin skuadrën e tyre me Superligën që çel sezonin e ri më 18 gusht me dy sfidat Dinamo-Egnatia dhe Teuta-Bylis.
Në vitet e fundit, transmetimi i futbollit vendës në Shqipëri ka kaluar sa në një kanal te tjetri dhe askush nuk e ka mbajtur më shumë sesa një sezon.
E njëjta situatë pritet të përsëritet edhe për sezonin e ri, teksa Kategoria Superiore pritet të mos transmetohet në MCN TV dhe me shumë mundësi do të kalojë në një tjetër kanal.
Flitet për Radio Televizionin Shqiptar, me drejtuesit e këtyre të fundit që kanë shprehur interesim për transmetimin e kampionatit, por nuk po gjendet akoma gjuha e përbashkët dhe nuk ka asnjë njoftim zyrtar.
Edhe sezonin e kaluar, transmetuesi i kampionatit u bë zyrtar vetëm dy ditë para nisjes së javës së parë dhe mesa duket i njëjti precedent i pakuptimtë pritet të ndodhë edhe këtë vit.
Një tjetër problematikë është edhe emeri i kampionatit.Kategoria Superiore përfundon kontratën me Abissnet dhe pritet që të zhvillohet një ankand për shitjen e emrit të kampionatit shqiptar.
Kompania kishte një marrëveshje për tri vite, që ka përfunduar pak ditë më parë dhe sezonin e ri. Kampionati elitar në vendin tonë mund të marrë një emër tjetër, edhe pse ende nuk është bërë asnjë njoftim nga ana e Federatës Shqiptare të Futbollit angazhim i së cilës është duke lënë gjithçka në errësirë.
