Dy avionë të Forcave të Armatosura të Rumanisë kanë mbërritur këtë të mërkurë në Shqipëri, duke iu bashkuar përpjekjeve të forcave shqiptare për izolimin dhe shuarjen e vatrave të zjarrit, në disa zona problematike të vendit.
Lajmi është bërë i ditur nga Ministria e Mbrojtjes, sipas të cilës, dy avionët vijnë në vendin tonë, si mbështetje e Mekanizmit Evropian të Mbrojtjes Civile, pjesë e të cilit është edhe Shqipëria.
Ekuipazhet rumune do të dislokohen për gati 10 ditë në Bazën Ajrore të Kuçovës, ku do të koordinohen nga Agjencia Kombëtare e Mbrojtjes Civile për t’u angazhuar që sot, në vatrat e zjarrit, ku situata është më kritike.
Dy avionët ushtarakë janë njëri model C-27J (Spartan), që do të angazhohet në operacionet e fikjes së zjarreve si dhe tjetri C-130 (Hercules), i cili ofron mbështetje logjistike për C-27J, ndërsa kapaciteti është 6 ton ujë për çdo fluturim.
Shqipëria nuk ka mjete për shurjen e zjarreve, dhe pothuajse çdo vit, mbështetjen e kemi gjetur tek shtetet e tjera, të cilat na kanë ndihmuar me avionë për të ndërhyrë në vatrat kritike.
