148 kilogramë kokainë janë kapur në Livorno të Italisë javët e fundit, të fshehura në një ngarkesë me banane të destinuara për në Zvicër.
Media italiane “Il Tirreno” raporton se policia arrestoi korrierët shqiptarë të drogës, dy prej tyre vëllezër, të cilët kishin hyrë ilegalisht në portin industrial të qytetit toskan për të ‘mbledhur’ lëndën narkotike të fshehur në një kontejner që mbërrinte nga porti i Guayaquil (Ekuador).
Shqiptarët e arrestuar janë dy vëllezërit shqiptarë Ylber dhe Napolon Arshi, dhe Goliano Zhupa 30 vjeç.
Emri i Napolon Arshi nuk është i panjohur për policinë shqiptare. Në vitin 2016, 37-vjeçari nga Lepenica e Vlorës, u shpall në kërkim nga policia e qytetit bregdetar pasi kishte qëlluar me armë në ajër duke kanosur një person.
Sipas mediave italiane asnjë prej tyre nuk është rezident në Itali dhe nuk kishte dokumente identiteti, për këtë arsye nuk ishte e lehtë të identifikoheshin.
Tre të arrestuarit zgjodhën rrugën e heshtjes, pa dhënë asnjë informacion lidhur me përfshirjen e tyre në këtë aferë. Për momentin ata qëndrojnë në qeli, në paraburgim.
Në Gadishull, këto sasi të mëdha kokaine zakonisht përfundojnë kryesisht në rrugën Milano-Brescia dhe në kryeqytetin Romë, një pjesë shkon në Toskanë.
