Kreu i “Lëvizjes Bashkë”, Arlind Qori është revoltuar me faktin se kryebashkiaku i Tiranës, Erion Veliaj, korsitë e dedikuara për autobusët në kryeqytet i ka premtuar 9 vite më parë, dhe deri më sot ky premtim është i pambajtur, teksa ditën e sotme mediat e japin si “rrufe” lajmin se ka nisur puna, ndërkohë që nuk shtrohet asnjë pyetje se pse nuk janë bërë në 9 vjet.
Në një postim në rrjetet sociale, Qori shkruan se në 9 vitet e fundit mijëra qytetarë të Tiranës kanë vdekur para kohe prej ndotjes së shkaktuar nga gjendja e degraduar e transportit publik dhe trafiku i rënduar.
Qori shprehet se punët nisin vetëm kur piqen kushtet për të vjedhur më shumë, duke akuzuar kështu Veliajn për abuzime me fondet publike.
Reagimi i plotë:
Nëntë vjet pasi është zotuar se në Tiranë do të ndërtohen korsi të dedikuara autobusësh, Erion Veliaj mburret se po nisin punimet për ndërtimin e tyre. Siç pritej, lajmi është përhapur si rrufe në pothuajse të gjitha televizionet, portalet, gazetat, fletërrufetë dhe faqet e mundshme të rrjeteve sociale, pa shtruar për asnjë moment pyetjen: Ç’ke bërë ti zotëri nëntë vitet e fundit për lehtësimin e trafikut dhe transportit publik në Tiranë? Sa kanë fituar grosistët e naftës nga mbikonsumi i naftës në trafikun e Tiranës?
Në nëntë vitet e fundit mijëra qytetarë të Tiranës kanë vdekur para kohe prej ndotjes së shkaktuar nga gjendja e degraduar e transportit publik dhe trafiku i rënduar. Për të mos llogaritur, pastaj, orët e panumërta të humbura të punës e jetës duke udhëtuar nëpër rrugët e qytetit.
Sot Tirana është shumë më e ngarkuar se në vitin 2015, kur minimalisht duhej të kishte nisur puna për ndërtimin e korsive të dedikuara, duke e bërë më të vështirë dhe të kushtueshme ndërhyrjen për ndërtimin e këtyre korsive. Po Erion Veliajt aq i bën. Punët nisin vetëm kur piqen kushtet për të vjedhur më shumë.
